पोखरा ।

सीप हस्तान्तरणद्वारा सशक्तीकरण (नेस्ट) को नेतृत्व सूर्यप्रसाद न्यौपानेले पाएका छन् । शनिबार पोखरामा सम्पन्न संस्थाको २३ औं वार्षिक साधारण सभा र १० औं अधिवेशनले उनको अध्यक्षतामा नयाँ कार्यसमिति सर्वसम्मत निर्वाचित गरेको हो ।

नवगठित कार्यसमितिमा कमलादेवी श्रेष्ठ उपाध्यक्ष, कुमबहादुर गुरुङ सचिव, सन्देश सुवेदी कोषाध्यक्ष र प्रभा आचार्य सहसचिव बनेका छन् । निर्वाचन समिति संयोजक अधिवक्ता भुवन पराजुलीले पदाधिकारी चयनबारे जानकारी दिइन् ।

यसैगरी कार्यसमिति सदस्यमा प्राडा पदम श्रेष्ठ, महेन्द्रप्रसाद लामिछाने, कृष्णबहादुर भण्डारी र हिराकुमारी गुरुङ रहेका छन् । लेखा समिति संयोजकमा मोना भण्डारी चयन भएकी छिन् भने सदस्यमा केदार धमला र गिरिधारी पोख्रेल निर्वाचित भएका छन् । निर्वाचन समितिमा हरिप्रसाद लुइँटेल र सुरेन्द्रबाबु तिवारी सदस्यका रूपमा संलग्न थिए ।

अधिवेशन संस्थाका तत्कालीन अध्यक्ष आनन्दकुमार पराजुलीको अध्यक्षतामा भएको हो । कार्यक्रममा सहसचिव रविन श्रेष्ठले सञ्चालन गरेका थिए भने स्वागत मन्तव्य कार्यसमिति सदस्य प्रभा आचार्यले दिएकी थिइन् । सचिव सूर्यप्रसाद न्यौपानेले वार्षिक प्रतिवेदन प्रस्तुत गरेका थिए भने कोषाध्यक्षको प्रतिवेदन सन्देश सुवेदीले पेस गरेका थिए ।

नव–निर्वाचित पदाधिकारी र सदस्यलाई निर्वाचन समिति संयोजक पराजुलीले शपथ ग्रहण गराइन् । शपथपछि अध्यक्ष बनेका न्यौपानेले संस्थालाई अझ प्रभावकारी ढंगले अघि बढाउने प्रतिबद्धता व्यक्त गर्दै भने, ‘नयाँ प्रविधि र नयाँ सोचलाई संस्थागत गर्दै अघि बढ्छौं ।’