दमौली (तनहुँ) । जिल्ला प्रशासन कार्यालय तनहुँले फरक क्षमता (अपांगता) भएका व्यक्तिलाई निवासमै पुगेर नागरिकताको प्रमाणपत्र प्रदान गर्ने कार्यलाई निरन्तरता दिएको छ।

यसै क्रममा प्रमुख जिल्ला अधिकारी रामकृष्ण अधिकारीले आइतबार व्यास नगरपालिका–११ का मिनानाथ पन्थ र पवित्रादेवी पन्थकी फरक क्षमता भएकी छोरी २७ वर्षीया सबिना पन्थलाई निवासमै नागरिकताको प्रमाणपत्र प्रदान गरे।

विविध कारणवश हालसम्म नागरिकता प्राप्त नगरेकी सबिनालाई नागरिकताको प्रमाणपत्र प्रदान गरिएको प्रजिअ अधिकारीले जानकारी दिए।

सबिनाको नागरिकता प्रमाणपत्रको सम्पूर्ण विवरण जिल्ला प्रशासन कार्यालयमा तयार पारिएको थियो। प्रमुख जिल्ला अधिकारी अधिकारीले भने, ‘छिटो, छरितो र सहुलियत ढंगले सेवा प्रवाह गर्नु हाम्रो कर्तव्य हो। सबिना अपांगता भएका कारण आवतजावतमा समस्या हुने भएपछि घरमै पुगेर नागरिकता दियौँ। यस्ता कार्यले सरकारप्रतिको भरोसा र सकारात्मक धारणा थप अभिवृद्धि भएर जानेछ।’

यसअघि प्रजिअ अधिकारीले गत साउन ६ गते म्याग्दे गाउँपालिका–१, गुणादी निवासी फरक क्षमता भएकी २० वर्षीया नबिना खनाललाई उनको निवासमै नागरिकताको प्रमाणपत्र प्रदान गरेका थिए। रासस