नेपाली संगीत उद्योगमा केही कलाकार यस्ता हुन्छन्, जसले आफ्नो प्रतिभामात्र होइन, जीवनका चुनौतीहरू पार गर्दै जनमानसमा गहिरो प्रभाव छाडेका छन् । त्यस्तै एक नाम हो, उज्ज्वल सागर । दृष्टिविहीन जन्मिए पनि आज उनी नेपाली संगीतमा ‘द्रष्टा’ कलाकारको रुपमा चिनिँदै छन् ।

उज्ज्वल सागर, जसको वास्तविक नाम हो सागर अधिकारी । उनको जन्म २०५५ सालमा झापाको बिर्तामोडनजिकै भएको थियो । सानै उमेरदेखि संगीतमा रुचि राख्ने उज्ज्वलले ४ वर्षको उमेरमै हार्मोनियम बजाउन थालेका थिए । शिक्षक, बाबुआमाले दिएको प्रेरणा र क्यासेट प्लेयरले उनलाई संगीतको संसारमा पुर्‍यायो । संगीतप्रतिको गहिरो मोह राख्ने सागर दृष्टिविहीन भए पनि सांगीतिक यात्रा विचलित भएका छैनन् ।

झापाको सरस्वती माध्यमिक विद्यालय र दुर्गा मावि हुँदै महेन्द्ररत्न स्कुलसम्मको यात्रा उनले औपचारिक अध्ययनसँगै संगीतको तालिममा बिताएको सुनाए । अनिल फागोबाट तालिम लिएका उज्ज्वलले प्रयाग संगीत समिति, इलाहाबाद (भारत)बाट परीक्षा पनि दिए । ‘सानै उमेरदेखि नै विभिन्न विद्यालयस्तरीय प्रतियोगितामा सहभागी भएर थुप्रै पुरस्कार जितेको छु, सन् २०१५ मा काठमाडौं आएर संगीत क्षेत्रमा पूर्णकालीन रुपमा यात्राअघि बढिरहेको छ,’ उनले भने ।

गीत कम्पोज गर्ने, गाउने र प्रविधिको सहयोगले संगीत उत्पादन गर्न आफैं सिकेको उनको भनाइ छ । उनी टकब्याक सपोर्ट भएको भ्वाइस ओेभर सफ्टवेयर प्रयोग गरी प्रोफेसनल डिजिटल टुलमार्फत आफ्ना गीत तयार पार्ने गर्छन् । भन्छन्, ‘सुरुवातमा केही अन्योल भए पनि प्रविधि र निरन्तर अभ्यासले आत्मनिर्भर बनाएको छ । गीत लेखनमा रोशन दाइले सहयोग गर्नुहुन्छ ।’ उनका गीतहरु युट्युब, स्पोटिफाइ, आइट्युन्स जस्ता विश्वव्यापी प्लेटफर्ममा उपलब्ध छन् ।

जन्मिदा दृष्टिविहीन रहेका उज्ज्वल सागर आफ्नै संघर्षले नेपाली संगीतमा स्थापित भएका छन् । उनी असाेज ३ गते पोखराको रोलिङ स्टोनमा आउँदै छन् ।

Advertisement

संगीत यात्रा र सफलता
२०१९ मा ‘धुन’ नामक गीतबाट औपचारिक संगीत यात्रा सुरु गरेका उज्ज्वलले हालसम्म २० भन्दा बढी एकल गीत, केही चलचित्रमा संगीत र ३० भन्दा बढी कलाकारहरूसँग सहकार्य गरिसकेका छन् । ‘सुन न तिमी खुसी त छौ नि’, ‘सुनाखरी’, ‘मिर्मिरे’, ‘मैली’, ‘सन्नाटा’, ‘डाइलो’ लगायत गीतले दर्शक, स्रोताको मन जितेका छन् ।

उज्ज्वलले रामकृष्ण ढकाल, नवराज पराजुली, निशान भट्टराई, विद्या तिवारी जस्ता कलाकारसँग सहकार्य गरेका छन् । उनले लेखक वसन्त बस्नेतको पुस्तक ‘सिमसार’को शीर्ष गीत पनि कम्पोज गरेका छन् ।

उनको जीवनलाई समेटिएको डकुमेन्ट्री ‘हेर्ने कथा’मा पनि समावेश गरिएको छ । उनले त्यसका लागि जिंगल गीत पनि तयार गरेका छन् । आर्टमन्डु जस्ता नाम चलेका प्रोडक्सनसँग सहकार्य गर्नुका साथै, ‘सानो संसार’ र ‘हात्ती छाप’ जस्ता चलचित्रमा पनि उनी संलग्न भए ।

प्रत्यक्ष प्रस्तुति र संगीत टोली
२०७९ मा ललितपुरमा आयोजना गरिएको पहिलो प्रत्यक्ष संगीत कार्यक्रममा ३ सयभन्दा बढी दर्शकको उपस्थिति थियो । उज्ज्वलले पोखरामा लिटरेचर फेस्टिभलमा संगीत प्रस्तुत गरेका थिए । जुन अवसरलाई उनले स्मरणीय अनुभव मानेका छन् ।
उनको ब्यान्डका सदस्यमा गिटारमा नरेन मोक्तान, बास गिटारमा जय लामा, ड्रममा रिदम बोगटी, बासुरीमा रुपेश शाक्य, किबोर्डमा विश्व अधिकारी, तबलामा आयुष ढकाल, साउन्ड इन्जिनियरमा सबिन शाक्य र व्यवस्थापनमा सरोज कुमार खड्का छन् ।

आगामी योजनामा उनले केही चलचित्र प्रोजेक्टमा काम गरिरहेका छन् भने अन्तर्राष्ट्रिय टुर र सहकार्यको सपना रहेको सुनाउँछन् । ‘नेपाली संगीतलाई अन्तर्राष्ट्रिय स्तरमा पुर्‍याउने चाहना छ । म विश्वास गर्छु, मन छ भने बाटो आफैं बन्ने गर्छ,’ उनले भने ।

असाेज ३ गते पोखराको रोलिङ स्टोनमा दोस्रो प्रस्तुति दिने तयारीमा रहेको उनले जानकारी दिए । पोखरामा दर्शकसँग प्रत्यक्ष भेटेर प्रस्तुति दिनका लागि उज्ज्वल उत्साही छन् । त्यसका लागि उनी अहिले तयारी गर्दै छन् ।