काठमाडौं ।

नयाँबानेश्वरमा भएको ‘जेन-जी’ प्रदर्शनमा प्रहरीको गोली लागेर घाइते भएका एक जना प्रदर्शनकारीको मृत्यु भएको छ। नयाँबानेश्वरस्थित सिभिल अस्पतालमा उपचारका क्रममा उनको ज्यान गएको हो। मृतकको परिचय खुल्न बाँकी छ।

सिभिल अस्पतालका निर्देशक मोहन रेग्मीका अनुसार, अस्पतालमा उपचाररत अन्य ७० देखि ८० जना घाइते प्रदर्शनकारी छन्। सोमबार दिउँसो बानेश्वरमा भएको प्रदर्शनमा प्रहरीले चलाएको गोली लागेर दर्जनौं प्रदर्शनकारी घाइते भएका थिए।

प्रदर्शनकारीहरू बानेश्वरको निषेधित क्षेत्र तोडेर संसद भवनभित्र पसेपछि अवस्था थप तनावपूर्ण बनेको थियो। प्रहरीले भीड नियन्त्रणका लागि पानीको फोहोरा, अश्रुग्यास र गोली चलाएको थियो। घाइतेहरूको सिभिल, एभरेस्टसहित आसपासका विभिन्न अस्पतालमा उपचार भइरहेको छ।

मोहनचन्द्र रेग्मी, सिभिल अस्पतालका कार्यकारी निर्देशकले बताए, ‘एक जनाको मृत्यु भएको छ। अस्पतालभित्र दर्जनौं घाइते छन्। ठाउँ व्यवस्थापन गर्न गाह्रो भएको छ। अन्त पठाउनेबारे मिलाउँदैछौँ।’

सरकारले लगाएको सामाजिक सञ्जालमाथिको प्रतिबन्ध र भ्रष्टाचारको विरोधमा ‘जेन-जी’ हरू सडकमा उत्रिएका हुन्। काठमाडौँलगायत देशका मुख्य सहरहरूमा विरोध प्रदर्शन भइरहेको छ।