काठमाडौं। प्रधानमन्त्री केपी शर्मा ओलीले सोमबार राजधानीमा भएको जेनजीहरूको प्रदर्शनमा बाहिरी तत्वले घुसपैठ गरेको बताएका छन् । मन्त्रिपरिषद्को सोमबार साँझ बसेको बैठकमा उनले सो आन्दोलनबारे ब्रिफिङ गर्दै यस्तो बताएका हुन् ।

उनका अनुसार जेनजीहरूले सुरुवातमा शान्तिपूर्ण र सकारात्मक ढंगले प्रदर्शन गरेका थिए । ‘युवा पुस्ताको आन्दोलन शान्तिपूर्ण हुने अपेक्षा थियो । हामी संवेदनशील पनि थियौं,’ उनले भने, ‘तर, आन्दोलनमा घुसपैठ भएको महसुस भएको छ ।’

प्रधानमन्त्रीले घुसपैठको विषयमा जेनजीहरू आफैंले पनि स्वीकार गरिसकेको बताए । ‘यो कुरा जेनजीले पनि स्वीकार गरेका छन् । त्यही घुसपैठकै कारण युवाको ज्यान गएको हो,’ उनले बैठकमा भने ।

साथै उनले सामाजिक सञ्जाल तत्काल बन्द गर्न सकिने अवस्था नभएको जानकारी पनि बैठकमा दिएका थिए ।