काठमाडौं । करिब चार घण्टा लामो जुम बैठकपछि जेन–जी समूहले पूर्वप्रधानन्यायाधीश सुशीला कार्कीलाई तत्कालका लागि नेता स्वीकारेर अन्तरिम सरकार बनाउने प्रस्ताव अघि सारेको छ ।

बैठकमा सहभागी युवाहरूले कुनै पनि राजनीतिक दलसँग आबद्ध व्यक्तिले वार्ता वा नेतृत्व लिन नहुने अडान राख्दै हाल नागरिक अभियन्ता समेत रहेकी कार्कीलाई साझा नेतृत्वको रूपमा अघि सार्ने निष्कर्ष निकालेका हुन् ।

भर्चुअल छलफलमा जेन–जी पुस्ताले भनेका छन्, “पूर्वप्रधानन्यायाधीश सुशीला कार्कीलाई स्वीकारेर जान सकिन्छ । त्यसपछि बालेन शाह र सागर ढकालहरू पनि विकल्पका रूपमा हुनुहुन्छ । अहिलेको परिस्थितिमा अन्तरिम सरकारको नेतृत्व सुशीला कार्कीले गर्न सक्नुहुन्छ ।”

बैठकमा उनीहरूले कार्कीभन्दा उपयुक्त र सर्वमान्य अर्को व्यक्ति अहिले नभएको भन्दै उनको नाममा औपचारिक नोटिस निकाल्न र घोषणा गर्नुपर्ने धारणा राखेका छन् ।

जेन–जी समूहले छलफलमा सर्वमान्य एजेन्डा र सबैले पत्याउने नेतृत्व हुनुपर्ने अडान दोहोर्‍याएको छ । यसअघि प्रधान सेनापति अशोकराज सिग्देलले राष्ट्रिय स्वतन्त्र पार्टी (रास्वपा) र दुर्गा प्रसाईँसँग वार्तामा बस्न सुझाव दिएको खुलासा भएको थियो ।