काठमाडौँ । नेपाली कांग्रेसका सभापति शेरबहादुर देउवाको स्वास्थ्य अवस्था खतरामुक्त रहेको जनाइएको छ । उनी र पत्नी आरजुलाई सुरक्षित स्थानमा राखेर उपचार भइरहेको शेरबहादुरका स्वकीय सचिव भानु देउवाले जानकारी दिए ।

मंगलबार जेनजी प्रदर्शनकारीले बुढानीलकण्ठस्थित निवासमा प्रवेश गरेर देउवा दम्पतीमाथि आक्रमण गरेका थिए । आक्रमणमा परेका देउवालाई सेनाको हेलिकप्टरमार्फत उद्धार गरिएको थियो । सामाजिक सञ्जालमा सार्वजनिक भएका भिडियोमा उनको शरीर रगताम्मे देखिएको छ ।

सुरुमा उनलाई छाउनीस्थित सैनिक अस्पतालमा लगिएको भए पनि त्यसपछि अन्यत्र सुरक्षित स्थानमा सारेर उपचार भइरहेको सैनिक स्रोतले जनाएको छ ।

सरकारका एक उच्च अधिकारीका अनुसार देउवाको स्वास्थ्य अवस्था स्थिर छ र उनी खतरामुक्त छन् । उनकी पत्नी आरजु राणा देउवा पनि सुरक्षित स्थानमा रहेको जनाइएको छ ।