पोखरा । जताततै जारी अशान्त, भय र निषेधाज्ञाको वातावरणबीच कास्की प्याब्सनले आगामी २९ भदौदेखि सुरु हुने निजी विद्यालयहरूको त्रैमासिक परीक्षा नरोकिने म्यासेज पठाएको छ । तर, यस कदमले अभिभावक र विद्यार्थीमा असमझदारी र चिन्ता बढाएको छ ।

साहित्यकार सरस्वती प्रतीक्षाले फेसबुकमा आफ्नो स्टाटस मार्फत अभिव्यक्ति दिँदै भनेकी छन्, ‘टाढा–टाढाबाट परीक्षा दिन आउनु पर्ने विद्यार्थीहरूको आवतजावत र सुरक्षाको जिम्मा कसले लिन्छ ? नजिकैबाट विद्यालय पुगे पनि यस्तो सकस र त्रसित मानसिकताका बीच बालबालिकाहरू कसरी सामान्य भएर परीक्षा दिन सक्छन् ?’

उनले खेद प्रकट गर्दै प्याब्सनको निर्णयलाई ‘दशैअघि फि उठाउनको लागि मात्र बच्चाहरूको ज्यान जोखिममा पार्ने काइदा’ भनेर आलोचना गरेकी छन् ।

अभिभावक र शिक्षकहरू दुवै पक्षले सुरक्षा र मानसिक स्वास्थ्यलाई ध्यानमा राख्दै परीक्षा संचालन गर्नुपर्ने आवाज उठाइरहेका छन् । तर हालको अशान्त परिस्थितिमा विद्यार्थी र अभिभावक दुबै असुरक्षित महसुस गरिरहेका छन् ।

सरस्वती प्रतीक्षाले सरकार र सम्बन्धित निकायलाई पनि आह्वान गरेकी छन् कि शिक्षा र परीक्षा जस्ता संवेदनशील विषयमा बालबालिकाको सुरक्षालाई सर्वोच्च प्राथमिकता दिइनुपर्छ ।

यसरी, कास्कीमा निजी विद्यालयको त्रैमासिक परीक्षा र असुरक्षित वातावरणबारे सार्वजनिक चासो र सामाजिक सञ्जालमा बहस तीव्र बन्दै गएको छ ।