काठमाडौं । अन्तरिम सरकार गठनका लागि शुक्रबार बिहान ९ बजेका लागि तय गरिएको राष्ट्रपति कार्यालय शीतल निवासको वार्ता आन्तरिक तयारीका कारण दिउँसो २ बजेका लागि सारिएको छ । राष्ट्रपति कार्यालय स्रोतका अनुसार छलफल अझै पेचिलो मोडमा पुगेको छ र त्यसलाई व्यवस्थित पार्न समय आवश्यक देखिएकाले वार्ताको समय परिवर्तन गरिएको हो ।

राष्ट्रपति रामचन्द्र पौडेलले बिहीबारदेखि नै राजनीतिक दल, संविधानविद्, कानुनविद् र जेनजी प्रतिनिधिहरूसँग अन्तरिम सरकार गठनबारे निरन्तर वार्ता गरिरहेका छन् । बिहीबार बेलुकीदेखि सुरु भएको सर्वपक्षीय छलफल शुक्रबार बिहान ३ बजेसम्म चले पनि निष्कर्षमा पुग्न सकेन । मुख्य विवाद अन्तरिम सरकारको नेतृत्व पूर्वप्रधानन्यायाधीश सुशीला कार्कीलाई दिने विषयमा सहमति भए पनि संविधानअनुसार प्रधानमन्त्री प्रतिनिधिसभा सदस्य हुनुपर्ने प्रावधानले अन्योल सिर्जना गरेको हो ।

वार्तामा सहभागी स्रोतका भनाइमा, ‘सहमति त कार्कीलाई नेतृत्व दिनेमा बनेको छ, तर संविधानले तोकेको बाटो कसरी पूरा गर्ने भन्ने टुंगो अझै लागेको छैन । यही कारण वार्ता लम्बिएको हो ।’

यसअघि बिहीबार राष्ट्रपति पौडेलले संविधानको धारा ६१ (४) मा रहेको ‘बाधा अड्काउ फुकाऊ’ प्रावधान प्रयोग गरेर संवैधानिक जटिलता हल गर्न सकिने/नसक्ने विषयमा संविधानविद् भीमार्जुन आचार्य, विपिन अधिकारीलगायतसँग परामर्श गरेका थिए ।

जेनजी आन्दोलनमा संलग्न युवाहरू संसद् विघटन र त्यसपछिका राजनीतिक प्रक्रियालाई अस्वीकार गर्दै आएका छन् । उनीहरूको प्रमुख माग संविधानमै तोकिएको लोकतान्त्रिक मार्ग अवलम्बन गरी नयाँ राजनीतिक सहमति खोज्ने रहेको छ । यही दबाबबीच राष्ट्रपतिले शीतल निवासमा भइरहेको वार्तालाई निष्कर्षमा पुर्‍याउने प्रयास गरिरहेका छन् ।