काठमाडौं । नेपाली कांग्रेसका नेता डा. शेखर कोइरालाले काँग्रेससँग आँसु बगाउने वा पश्चातापमा समय खर्च गर्ने अवस्था नरहेको बताएका छन् । उनले पछिल्लो समय काँग्रेस नेपाली जनताको आकांक्षाअनुरूप खरो उत्रिन नसकेको स्वीकार गर्दै, अब प्रायश्चित गरेर अगाडि बढ्नुपर्ने धारणा राखेका छन् ।

“यसका लागि गर्नुपर्ने प्रायश्चित हामी पछि पर्दैनौँ, गर्नुपर्छ,” कोइरालाले भने, “लोकतान्त्रिक इतिहासका योद्धा, नेता र सहिदलाई सम्झेर काँग्रेसले भावी बाटो तय गर्नुपर्नेछ ।”

जेनजी आन्दोलनपछि बनेको नयाँ राजनीतिक परिस्थितिलाई सम्बोधन गर्दै उनले समाज र नयाँ पुस्ताको परिवर्तन चाहनालाई काँग्रेसले आत्मसात् गर्नुपर्नेमा जोड दिए । उनका अनुसार काँग्रेस अब तत्काल अभियानमा उत्रनु आवश्यक छ ।

“नेपाली समाजमा परिवर्तनको तीव्र चाहना छ । हाम्रा युवा आफ्नै देशमै समृद्ध भविष्य खोजिरहेका छन्,” उनले उल्लेख गरे, “काँग्रेस त्यही चाहनाको माध्यम बन्नुपर्छ भन्ने नागरिकको अपेक्षा छ । हाम्रो भावी ध्येय यसैमा केन्द्रित हुनुपर्छ ।”

कोइरालाले जेनजी आन्दोलनका कारण भएको सरकारको विस्थापनलाई समयको पदचापअनुसार नहिँड्न जान्दाको परिणाम भनेका छन् । यस क्रममा काँग्रेसतर्फबाट केही रणनीतिक कमजोरी भएको स्वीकार पनि गरे ।

“समयको पदचापअनुरुप हिँड्न नसक्दा आन्दोलनले दुई ठूला दललाई सत्ताबाट बाहिर हुन बाध्य पार्‍यो,” उनले भने, “समाज र उर्जावान युवा एकातिर भए, तर काँग्रेसको सोच अर्कोतिर बग्यो । केही रणनीतिक गल्ती भए, हामी चुकेँ ।”

उनले अब काँग्रेसभित्र सत्ता सम्हाल्ने वा गुमाउने बहस समाप्त भएको भन्दै, जनताको विश्वास जित्ने दिशातर्फ लाग्नुपर्ने बेला आएको स्पष्ट पारे ।