पोखरा ।
पोखराको निजी क्षेत्रले जेन–जी आन्दोलनले खल्बलिएको व्यावसायिक वातावरण सुधार्न र व्यवसायीहरूको मनोबल बढाउन जेन–जी पुस्तासँग सहकार्य गर्ने भएको छ । सुरक्षाको प्रत्याभूतिसहित थप लगानीका लागि व्यवसायीलाई प्रोत्साहित गर्ने सहमति भएको छ ।

पोखरा उद्योग वाणिज्य संघका अध्यक्ष गोकर्ण कार्कीले जेन–जी पुस्ताका प्रतिनिधिहरूसँगको पटक–पटकको छलफलपछि यो सहकार्यको वातावरण बनेको बताए । छलफलमा जेन–जीका प्रतिनिधिहरूले निजी क्षेत्रलाई लगानीका लागि प्रोत्साहन गर्न र भयरहित वातावरणमा व्यवसाय सञ्चालन गर्न सहयोग गर्ने प्रतिबद्धता जनाएका थिए ।

अध्यक्ष कार्कीको संयोजकत्वमा ‘व्यावसायिक वातावरण निर्माण एवम् सुरक्षा समिति’ गठन गरिएको थियो । पोखराका विभिन्न क्षेत्रका निजी क्षेत्रका प्रतिनिधिहरूको भेलाले यो समिति बनाएको हो । समितिले व्यावसायिक वातावरण निर्माण, शान्ति सुरक्षाको प्रबन्ध र व्यवसायीलाई आश्वस्त पार्ने काममा जेन–जी पुस्तालाई पनि सहभागी गराउने निर्णय गरेको थियो ।
यसअघि भएको संवादमा जेन–जी पुस्ताको प्रतिनिधित्व गर्दै आर्यनकुमार जैयसवाल, सरोज पराजुली, अनुप घिमिरे, सन्देश पराजुली, रोशनी गुरुङ र पूजा फगामी सहभागी थिए ।

जेन–जी प्रतिनिधिहरूसँगको बैठकपछि पोखरा उद्योग वाणिज्य संघका अध्यक्ष गोकर्ण कार्कीको संयोजकत्वमा गठित व्यावसायिक वातावरण निर्माण एवम् सुरक्षा समिति र जेन–जी (दुवै पक्ष) बीच केही महत्त्वपूर्ण निर्णयहरू भएका छन् ।
ती निर्णयहरूमा जेन–जी आन्दोलनमा ज्यान गुमाएकाप्रति श्रद्धाञ्जली व्यक्त गर्ने र घाइतेको शीघ्र स्वास्थ्यलाभको कामना गर्ने कुरा उल्लेख छ । भ्रष्टाचारको अन्त्य र सुशासनको पक्षमा आवाज बुलन्द पार्ने, २०८२ भदौ २३ गते भएको दमनको निष्पक्ष छानबिन गरी दोषीलाई कारबाहीको माग गर्ने, २०८२ भदौ २४ गते जेन–जीको आन्दोलनमा भएको घुसपैठबाट सिर्जित तोडफोड, लुटपाट र आगजनीजस्ता आपराधिक कार्यमा संलग्नमाथि कारबाही तथा क्षतिपूर्तिको लागि सरकारसँग माग गर्ने निर्णय पनि भएको छ ।

संयोजक कार्कीले व्यावसायिक वातावरण निर्माण, नवप्रवर्तन, लगानी प्रोत्साहन, उद्योगी–व्यवसायीहरूलाई सुरक्षाको प्रत्याभूति गराउन एवम् खल्बलिएको व्यावसायिक वातावरणलाई लयमा ल्याउन दुवै पक्ष एकजुट भई अगाडि बढ्ने सहमति भएको जानकारी दिए ।

‘सहमति कार्यान्वयन र भावी कार्यदिशा तय गर्न आवश्यकता अनुसार छलफल र बैठकको आयोजना गर्ने निर्णय भएको छ,’ संयोजक कार्कीले भने, ‘व्यवसायीमाथि पुनः आक्रमण नहोस्, दोषीमाथि कारबाही होस्, व्यवसायीले क्षतिपूर्ति पाऊन् भन्नेमा जेन–जी पुस्ता स्पष्ट छ । परिवर्तनको लागि सो पुस्ताले निभाएको भूमिकाको हामीले सराहना गरेका छौँ र सुशासनको मुद्दामा सँगै काम गर्ने प्रतिबद्धता जनाएका छौँ ।’

जेन–जी आन्दोलनको क्रममा पोखराको निजी क्षेत्रले २ अर्ब ५० करोड रुपैयाँभन्दा बढीको क्षति बेहोरेको प्रारम्भिक अनुमान छ । ‘व्यावसायिक वातावरण निर्माण एवं सुरक्षा समिति’ ले उद्योगी–व्यवसायीको गिरेको मनोबल उकास्नका लागि प्रशासन तथा सुरक्षा निकाय, राजनीतिक दल र नागरिक समाजसँगसमेत सहकार्य गर्ने पोखरा उद्योग वाणिज्य संघका पूर्वअध्यक्ष विश्वशंकर पालिखेले जानकारी दिए ।