पोखरा । देशलाई संविधान र लोकतन्त्रको मार्गमा फर्काउन नेकपा (एमाले)ले स्थानीय तहको वडातहसम्म जागरण भेला गरेको छ । प्रतिगामी षड्यन्त्रलाई परास्त गर्दै मुलुकलाई संवैधानिक व्यवस्थातर्फ फर्काउन भन्दै एमालेले वडा स्तरीय जनभेला गरेको हो ।

एमाले केन्द्रीय कमिटीको निर्णय र जिल्ला एवं पालिकाको निर्देशन अनुसार एकसाथ जनभेला गरेको एमाले कास्कीका अध्यक्ष बैनबहादुर अधिकारी क्षत्रीले जानकारी दिए । पार्टीको केन्द्रीय कमिटीको १० औं बैठकले निर्णय अनुसार कास्कीको पोखरा सहित रुपा, मादी, अन्नपूर्ण, माछापुच्छ्रेका वडामा सभा भएका छन् ।

एमाले पोखरा महानगर पालिका वडा कमिटी पोखरा ९ कास्कीले आयोजना गरेको कार्यक्रममा पार्टीका पोलिटब्युरो सदस्य जगत विश्वकर्माले संविधानभन्दा बाहिरबाट बनेको सरकारलाई जनताले समर्थन नगर्ने बताए । एमाले पोखरा ७ र १६ ले आयोजना गरेको जनभेलामा पार्टीका केन्द्रीय सदस्य कृष्ण थापाले संविधान विरोधी गतिविधिलाई जनताको दबाबबाट निस्तेज गर्न सकिने जनाए ।

एमालेको वडा कमिटी पोखरा ८ ले गरेको सभामा पार्टीका केन्द्रीय सदस्य तथा पोखरा महानगरपालिकाका उपमेयर मञ्जुदेवी गुरुङले संविधानको रक्षा, प्रतिगामी षडयन्त्रको बिरुद्धमा एमालेले वडा पालिका जिल्ला र काठमाडौं उपत्यकामा प्रर्दशन गर्न लागेको उल्लेख गरिन् ।

एमाले पोखरा महानगर कमिटीका पूर्व अध्यक्ष दिलीप न्यौपानेले जेन्जी पुस्ताको नाममा भएको प्रदर्शनले विदेशीको स्वार्थ पूरा गर्ने काम गरेको आरोप लगाए । उनले प्रियतावादी राजनीतिको सहारामा जेन्जी प्रर्दशन भएको जानकारी दिए ।

प्रियतावाद दीर्घकालीन रुपमा जनताको शत्रु भएको आरोप लगाउँदै उनले पार्टी अध्यक्ष केपी शर्मा ओलीलाई कमजोर पार्न सुरुदेखि नै प्रियतावादी राजनीतिक धारको प्रयोग भएको दाबी गरे । क्षेत्रीयतावादी, मधेशी, जातिवादी आन्दोलनमा एमाले तार्गेट भएको जानकारी दिँदै उनले हरेक खालका अतिवादका विरुद्ध एमालेले निरन्तर रुपमा संघर्ष गर्नु परेको बताए ।

उनले जेन्जी प्रर्दशनको क्रममा भएका नकारात्मक क्रियाकलापको नेपाली कांग्रेसले विरोध गर्न नसकेको उल्लेख गरे । ‘अहिलेको जस्तो धेरै कठिन अवस्थालाई एमालेले सामना गरेर पार लगाएको छ,’ उनले भने, ‘सबै भ्रम विस्तारै खुल्दै जाने छन् । अन्त्यमा एमालेको विजय सम्भव छ ।’ उनले विश्व व्यापारको बद्लावले नेपालको राजनीतिलाई प्रभाव पारेको बताए ।
अध्यारो मनोविज्ञानको प्रभाव र तनावको वेलामा गाली, आलोचना र भ्रम बिक्ने उल्लेख गर्दै उनले झुटा कुराले छिटो प्रभाव पार्ने चर्चा गरे । उनले सबै पार्टी तथा नेता खत्तम भन्ने भ्रम जनमानसमा फैलाउने काम भएको बताए । रणनीतिक राजनीतिलाई प्राथमिकतामा राख्ने बेलामा एमाले लोकप्रिय भएको स्मरण गर्दै उनले अंक गणितको राजनीतिलाई प्राथमिता दिँदा पार्टी कमजोर भएको स्वीकार गरे ।

संसद भित्रको गठजोड र संसदीय फोहोरी खेलमा एमाले लाग्यो भनेर जनतामा निराशा बढेको उल्लेख गर्दै उनले अंक गणितको राजनीतिलाई दोस्रो प्राथमिकता दिन पार्टी नेतृत्वलाई सुझाव दिए । केही आन्तरिक कारण र जनतामा विश्वासको वातावरण सिर्जना गर्न नसक्नुमा केही कमी, कमजारी भएको उल्लेख गर्दै उनले अहिलेका सबै घटनाक्रमको जिम्मेवार व्यक्ति केपी शर्मा ओली नभएको दाबी गरे ।

एमालेले प्रतिगामी षड्यन्त्रका विरुद्ध आगामी कात्तिक २५ पालिका स्तरीय जनप्रर्दशन र २९ गते जिल्ला स्तरीय जनसभा गर्न लागेको छ ।