पोखरा । चिल्ड्रेन नेपालले अन्तर्राष्ट्रिय बाल अधिकार दिवस २०२५ का अवसरमा ४ सय बालबालिकालाई शैक्षिक सामग्री तथा न्यानो स्वेटर वितरण गरेको छ । ‘मेरो दिन, मेरो अधिकार’ भन्ने अन्तर्राष्ट्रिय र ‘बालबालिकामा लगानीः सुनिश्चित भविष्यको थालनी’ भन्ने राष्ट्रिय नारालाई सार्थक तुल्याउँदै संस्थाले बालबालिकालाई शैक्षिक सामग्री र न्यानो कपडा सहयोग गरेको हो ।

संस्थाले विभिन्न कार्यक्रममार्फत ४ सय बालबालिकालाई शैक्षिक सामग्री तथा न्यानो स्वेटर वितरण गर्दै आएको जनाएको छ । पोखरामा आयोजित विशेष समारोहमा भने श्रीकृष्ण मावि, जनप्रिय मावि, श्रीराम आधारभूत विद्यालय र धर्मस्थली आधारभूत विद्यालयमा अध्ययनरत ५२ जना बालबालिकाको सहभागिता थियो । संस्थाकी अध्यक्ष शान्त पौडेलको अध्यक्षतामा सम्पन्न कार्यक्रममा बालबालिकालाई सामग्री हस्तान्तरण गरिएको थियो ।

कार्यक्रममा कार्यकारी निर्देशक डिल्ली प्रसाद शर्माले स्वागत मन्तव्य राख्दै संस्थाले बाल अधिकार र शिक्षाको क्षेत्रमा पु¥याउँदै आएको योगदानबारे प्रकाश पारे । कार्यक्रमका प्रमुख अतिथि पोखरा महानगरपालिका वडा नम्बर ७ का अध्यक्ष राममोहन आचार्यले बालबालिकाको कल्याणमा चिल्ड्रेन नेपालले गरेको कामको सम्मान गर्दै बालबालिकामा लगानी गर्ने राष्ट्रिय नारालाई सफल पार्न स्थानीय सरकारका तर्फबाट सहकार्य र समन्वय गर्ने प्रतिबद्धता व्यक्त गरे ।

यसैगरी संस्थाका निवर्तमान अध्यक्ष एवं राष्ट्रिय बाल अधिकार परिषद्का सदस्य भीमलाल गुरुङले बाल अधिकारको कानुनी र व्यवहारिक कार्यान्वयन अपरिहार्य रहेको बताए । उनले बालबालिकाको भविष्य निर्माणमा साझा लगानीको महत्त्वलाई उजागर गर्दै राष्ट्रिय नारालाई सार्थक तुल्याउन थप ऊर्जा मिलेको धारणा राखे । सिर्जनशील बाल स्वावलम्बन समूहकी सचिव क्यारिस्का नेपालीले बालबालिकाको आवाज र सहभागिताको अधिकार सुनिश्चित गर्नुपर्ने कुरामा जोड दिइन् । उनले भनिन्, ‘संस्थाको साथ र सहयोगले बालबालिकाले विद्यालय निरन्तरता र क्षमता विकासका अवसर प्राप्त गर्न सफल भएका छौँ ।’

कार्यक्रममा संस्थाका उपाध्यक्ष विजयकुमार कार्की, श्रीकृष्ण माविका प्रधानाध्यापक प्रेम चपाईं लगायतको उपस्थिति रहेको थियो । सहभागी सबैले बालबालिकालाई शैक्षिक सामग्री तथा न्यानो स्वेटर वितरण गर्दै शुभकामना व्यक्त गरेका थिए । कार्यक्रम संयोजक रमेश सुवेदीले सञ्चालन गरेको उक्त समारोहको अन्त्यमा अध्यक्ष पौडेलले कार्यक्रम सफल बनाउन सहयोग गर्ने सम्पूर्ण अतिथि, विद्यालयका प्रधानाध्यापक र सहभागीहरूलाई धन्यवाद दिँदै कार्यक्रम समापन गरेका थिए ।