पोखरा ।
गण्डकी विश्वविद्यालय अन्तर्गत सञ्चालित बीए एलएलबी कार्यक्रमको आयोजनामा कानूनी प्रशिक्षण कार्यक्रम भएको छ । कार्यक्रम कानून तथा व्यवस्थापन संकायका डीन प्रा हेमराज गिरीको सभापतित्वमा भएको हो ।

गण्डकी प्रदेशका मुख्य न्यायाधिवक्ता तथा वरिष्ठ अधिवक्ता चिरञ्जीवी शर्माले विद्यार्थीलाई प्रशिक्षण दिएका थिए । उनले संघीय प्रणाली, प्रदेश सरकारको औचित्य र विधिको शासनमा मुख्य न्यायाधिवक्ताको भूमिकाबारे विस्तृत प्रस्तुति प्रदान गरे । मुख्य न्यायाधिवक्ता शर्माको प्रस्तुति अत्यन्त रोचक, व्यवहारिक र अनुभवसम्पन्न रहेको सहभागीहरूले प्रतिक्रिया जनाए ।

विश्वविद्यालयका निमित्त उपकुलपति तथा रजिस्ट्रार डा कैलाश तिमिल्सिनाले विद्यार्थीहरु सकारात्मक सोच, नेतृत्व क्षमता र सक्रिय सहभागीका कारण सदैव अग्रसर रहेको बताउँदै हौसला प्रदान गरे ।

उनले मुख्य न्यायाधिवक्ताजस्तो अनुभवी र सम्मानित व्यक्तित्वले प्रशिक्षण प्रदान गर्नु विश्वविद्यालयका लागि गौरवको विषय भएको उल्लेख गरे ।

डीन प्रा गिरीले कानून अध्ययनमा व्यवहारिक ज्ञान अत्यन्त महत्वपूर्ण हुने भन्दै यस्ता प्रशिक्षणले विद्यार्थीहरूलाई पेशागत मार्गचित्र निर्माणमा सहयोग पुर्‍याउने बताए ।

कार्यक्रममा सह–न्यायाधिवक्ता विपना भण्डारी, कार्यक्रम संयोजक अधिवक्ता रविकुमार सिलवाल विद्यार्थी सुमिका गौतम, मनोज सुवेदी लगायतले बोलेका थिए ।