पोखरा । मधेस प्रदेशका मुख्यमन्त्री सरोजकुमार यादवले पदबाट राजीनामा दिएका छन् । सर्वोच्च अदालतको परमादेश अनुसार विश्वासको मत लिन बोलाइएको प्रदेशसभा बैठकमा बहुमत नपुग्ने निश्चित भएपछि उनले बुधबार पदबाट राजीनामाको घोषणा गरेका हुन् ।

प्रदेशसभा बैठकलाई सम्बोधन गर्दै मुख्यमन्त्री यादवले रोष्टमबाटै राजीनामा दिएको बताए । आफूले सत्ता लम्ब्याउन नचाहेको भन्दै उनले आजै प्रदेश प्रमुखसमक्ष लिखित राजीनामा बुझाउने जानकारी सदनलाई गराए ।

यसअघि सर्वोच्च अदालतले सोमबार साँझ मुख्यमन्त्री यादवलाई २४ घण्टाभित्र विश्वासको मत लिन परमादेश जारी गरेको थियो । अदालतको आदेश पालना गर्दै बुधबार बिहान बैठक बोलाइए पनि सत्तापक्षकै सांसद अनुपस्थित हुने देखिएपछि बैठक दिउँसो २ बजेका लागि सारिएको थियो । तर, सत्ता साझेदार दलबाट मात्रै विश्वासको मत प्राप्त नहुने निष्कर्ष निकाल्दै उनले मार्गप्रशस्त गर्ने निर्णय गरेका हुन् ।

यादव संविधानको धारा १६८ को उपधारा ३ बमोजिम गत कात्तिक २३ गते मुख्यमन्त्री नियुक्त भएका थिए । तत्कालीन प्रदेश प्रमुख सुमित्रा सुवेदी भण्डारीले ठूलो दलको नेताको हैसियतमा उनलाई नियुक्त गरेकी थिइन् । तर, उक्त नियुक्ति असंवैधानिक भएको दाबी गर्दै प्रदेशका ७ दलका ७४ सांसद सर्वोच्च अदालत पुगेका थिए । सोही रिटमाथि सुनुवाइ गर्दै सर्वोच्चले मंसिर १५ गते विश्वासको मत लिन आदेश दिएको थियो ।

मुख्यमन्त्रीले राजीनामा घोषणा गरेको बैठकमा मन्तव्य राखिरहँदा विपक्षी ७ दलका सांसदहरूले भने बैठक बहिष्कार गर्दै बाहिरिएका थिए । यादवको राजीनामासँगै मधेस प्रदेशमा नयाँ सरकार गठनको ढोका खुलेको छ । अब प्रदेश प्रमुखले संविधानको धारा १६८ को उपधारा २ बमोजिम दुई वा दुईभन्दा बढी दलको समर्थनमा नयाँ सरकार गठनका लागि आह्वान गर्ने प्रक्रिया अघि बढ्नेछ ।