पोखरा ।
गुरुङ भाषाको ‘मुर्बै लयँ सारा’ बोलको गीतको म्युजिक भिडियो पोखरामा सार्वजनिक गरिएको छ ।

ब्रेज मेस्रो फिल्म प्रोडक्सन, घान्द्रुकको ब्यानरमा लामा अमृत फाउण्डेसन, घान्द्रुकले निर्माण गरेका गुरुङ चलचित्र सैंर्बे म्रुमा समावेश उक्त गीत धनबहादुर गुरुङ युट्युब च्यानलमार्फत सार्वजनिक गरिएको हो । गीतमा गायक धनबहादुर गुरुङ र गायिका ज्योति गुरुङ स्वर रहेको छ । उनीहरुलाई उषा, प्रिया, निशा र विजय गुरुङले साथ दिएका छन् । गीतको शब्द र संगीत गायक धनबहादुर गुरुङले भरेका हुन् ।

घान्द्रुक गाउँमा छायाँकन गरिएको गीतको म्युजिक भिडियोमा कलाकारहरु अमृत गुरुङ, लक्ष्मी गुरुङ, सुरज तमु र प्रिती गुरुङको अभिनय रहेको छ । साजन गुरुङको नृत्य निर्देशन रहेको भिडियो निकोलस गुरुङले कैद गरेका हुन् ।

भिडियो सार्वजनिक कार्यक्रममा कलाकार माओत्से गुरुङले चलचित्रमार्फत घान्द्रुकको सौन्दर्य, कला, संस्कार, संस्कृतिलाई विश्वमाझ परिचित बनाउने विश्वास व्यक्त गरे । चलचित्रमा काम गर्ने सबै अब्बल र अनुभवी भएकाले फिल्म सबैलाई मनपर्ने खालको बन्ने उनको अपेक्षा छ ।

चलचित्रका निर्देशक सोम गुरुङले चलचित्र गाउँले परिवेशमा घान्द्रुकको रहनसहनमा आधारित रहेको बताए । आँसु, हासो र रोदनको मिश्रण रहेको चलचित्रमा घान्द्रुक गाउँको आत्मियता मिसिएको उनको भनाइ छ । चलचित्रमा समावेश २ ओटा गीतमध्ये एउटा गीत सार्वजनिक गरिएको उनले सुनाए ।

कार्यक्रममा गीतका सर्जक धनबहादुर गुरुङ, नायिका लक्ष्मी गुरुङ, नृत्य निर्देशक साजन गुरुङ, स्थानीय यामु गुरुङलगायतले आफ्नो समुदायको प्रतिनिधित्व गर्ने चलचित्र र यसमा समेटिएको गीतलाई माया गरी हौसला प्रदान गर्न आग्रह गरेका थिए ।

चलचित्रका निर्माता तथा कलाकार अमृत गुरुङले चलचित्रको छायाँकनको काम सकेर इडिटिङको क्रममा रहेका जानकारी दिए । ल्होछार लगत्तै सैंर्बे म्रु प्रदर्शनका लागि तयार हुने उनले बताए ।