पोखरा ।
हेमजा युनाइटेड पोखरा २५ हेमजाले सोमबार विद्यार्थीलाई न्यानो कपडा तथा स्टेसनरी वितरण गरेको छ ।

युनाइटेडले वार्षिक क्यालेन्डर अनुसार पोखरा २५ हेमजा देवीस्थान स्थित गौरीशंकर आधारभूत विद्यालयका विद्यार्थीलाई कापी, कलम लगायतका स्टेसनरी र न्यानो कपडा वितरण गरेको हो । विद्यालयका ४२ विद्यार्थीलाई सामग्री हस्तान्तरण गरिएको क्लबका कोषाध्यक्ष एवं कार्यक्रम संयोजक निराजन अधिकारीले जानकारी दिए ।

विद्यालय व्यवस्थापन समितिका अध्यक्ष सन्तमान श्रेष्ठले विद्यालयको अवस्था, आवश्यकताबारे जानकारी दिनुका साथै सहयोगको पूर्ण सदुपयोग गर्ने वाचा गरे ।

युनाइटेडका अध्यक्ष कृष्णमान श्रेष्ठले वार्षिक क्यालेन्डर अनुसार खेलकुदसँगै मासिक रुपमा सामाजिक हितका लागि विभिन्न कार्य गर्दै आएको सुनाए । प्रविधियुक्त शिक्षालाई निरन्तरता दिन आग्रह गर्दै उनले आगामी दिनमा आवश्यक सहयोग र सहजीकरणको लागि संस्था तयार रहेको जनाए ।

कार्यक्रममा कार्यक्रम संयोजक निराजन अधिकारी, विद्यालय व्यवस्थापन समितिका निवर्तमान अध्यक्ष नारायणबहादुर कुँवर, प्रधानाध्यपक ईन्द्रकुमारी पुन, क्लबका सचिव महादेव अधिकारी लगायतले बोलेका थिए ।