पोखरा ।
फुटबलमार्फत सामाजिक सेवामा निरन्तर क्रियाशील सहारा क्लब पोखरालाई सर्वसाधारणले विभिन्न तरिकाले सहयोग गर्ने गरेका छन् । पछिल्लो समय एक ज्येष्ठ नागरिकले वृद्धभत्ता वापतको रकम नै क्लबले सञ्चालन गरेको सूर्यबहादुर केसी स्मृति सहारा आवासीय फुटबल एकेडेमीलाई प्रदान गरेका छन् ।

पोखरा ९ बसपार्क निवासी ८० वर्षीय एकप्रसाद थापामगरले यसरी सहयोग गरेका छन् । पोखराको बसपार्कमै ३० वर्षअघि स्थापना भएको सहारा क्लब पोखराका गतिविधि विगतदेखि नियालिरहेका थापाले क्लबका कार्यको प्रशंसा गर्दै वृद्धभत्ता दिएको बताए । दोबिल्ला स्थित एकेडेमीमा हालै आयोजित कार्यक्रममा उनले वृद्धाभत्ताबाट १६ हजार ६ सय बराबरको खाद्यान्न सामग्री एकेडेमीलाई सहयोग गरेका हुन् ।

एकेडेमीमा हाल चौंथो ब्याचको रुपमा विभिन्न जिल्लाका ३० बालक आश्रित छन् । उनीहरुलाई निःशुल्क आवासीय सुविधासहित शिक्षादीक्षा तथा फुटबल सिकाउने गरिएको क्लब अध्यक्ष केशवबहादुर थापाले बताए ।

सहयोग हस्तान्तरण क्रममा एकप्रसादका परिवारका सदस्यहरु पनि उपस्थित थिए । सोही अवसरमा पोखरा १७ निवासी विसन राना र रुपा रानाले छोरा नियोनको ११ आंै जन्मदिन अवसरमा बालकहरुलाई ३२ थान सिन प्याड, ३२ जोर मोजा प्रदान गरे ।

यसैबीच, क्लब हाल आहा रारा पोखरा गोल्ड कपको रजत संस्करणको तयारीमा जुटेको छ । राष्ट्रिय–अन्तर्राष्ट्रिय स्तरको उक्त प्रतियोगिता आगामी माघ २७ देखि फागुन ९ गतेसम्म पोखरा रंगशालामा हुँदै छ ।