पोखरा । पोखरा महानगरपालिका वडा नं ५ मालेपाटनस्थित विचारीचोकमा नवनिर्मित ढुंगेधारा उद्घाटन गरी समुदायलाई हस्तान्तरण गरिएको छ । सशस्त्र प्रहरी बल नेपालको २५औँ स्थापना दिवस (रजत जयन्ती) को अवसरमा सशस्त्र प्रहरी बल, नेपाल नं २४ गण हेडक्वाटर कालिका कास्की र पोखरा महानगरपालिका वडा नं ५ को सहकार्यमा क्विक इम्प्याक्ट प्रोजेक्ट अन्तर्गत ढुङ्गेधारा निर्माण गरिएको हो ।

सशस्त्र प्रहरी बल, नेपाल नं २४ गण हेडक्वाटर कालिका कास्कीका गणपति सशस्त्र प्रहरी उपरीक्षक सूर्यप्रसाद तिमिल्सिनाले सशस्त्र प्रहरी बल नागरिकको सुरक्षा मात्र नभई सामाजिक उत्तरदायित्व बहनमा समेत सक्रिय रहेको बताए । उनले समुदायको दैनिक जीवनसँग प्रत्यक्ष सरोकार राख्ने यस्ता परियोजनाले नागरिक र सुरक्षाकर्मीबीचको सम्बन्ध थप मजबुत बनाउने विश्वास व्यक्त गरे ।

पोखरा महानगरपालिका वडा नं ५ का वडा अध्यक्ष विष्णुप्रसाद बरालले ढुंगेधाराले स्थानीय बासिन्दाको खानेपानी समस्यामा राहत पुग्ने बताउँदै सशस्त्र प्रहरी बलको योगदानको प्रशंसा गरे ।

उद्घाटन समारोहमा वडा सदस्यहरू, समाजसेवी तथा स्थानीय बासिन्दाको उल्लेख्य उपस्थिति थियो । कार्यक्रमको अन्त्यमा ढुंगेधारालाई औपचारिक रुपमा समुदायको संरक्षण र उपयोगका लागि हस्तान्तरण गरिएको छ ।

सशस्त्र प्रहरी बल कालिका गण सामाजिक कार्यमा समेत योगदान दिँदै आएको छ ।