समाधान संवाददाता
पोखरा

गण्डकीका प्रदेश प्रमुख अमिक शेरचनले संविधान, नियम कानुन अनुसार हिम्मतका साथ काम गर्न अख्तियारलाई सुझाव दिएका छन् । उनले सार्वजनिक ओहोदामा रहेका व्यक्तिको आदेश नमान्नसमेत सुझाए । अख्तियार दुरुपयोग अनुसन्धान आयोगको २९ औं वार्षिकोत्सवको अवसरमा आयोग कार्यालय पोखराले मंगलबार आयोजना गरेको कार्यक्रममा शेरचनले राम्रो काम गर्दा गर्दै पनि अख्तियारको काम अधुरो भएको जनताको गुनासो रहेको उल्लेख गरे ।

‘अख्तियारका आयुक्त र कर्मचारीले निष्कलंक र निष्पक्ष भावनाले काम गर्ने हो । पदमा बसेको व्यक्तिको आदेश मान्ने होइन,’ प्रदेश प्रमुख शेरचनले भने, ‘मैले कानुन विपरीत काम गर्नुस् भने पनि नगर्नुस् । मेरा छोराछोरीले गलत गरे नछोड्नुस् ।’ आफू उपप्रधान तथा स्वास्थ्यमन्त्री हुँदा १ व्यक्ति पोकोभरि पैसा लिएर घर आएको स्मरण गर्दै प्रदेश प्रमुख शेरचनले पैसा राजस्वमा पठाएर ती व्यक्तिलाई बर्खास्त गरेको सुनाए ।

स्वयं प्रदेश प्रमुखको कामको समेत निगरानी गर्न आग्रह गर्दै उनले आफ्नो कार्यकालमा प्रदेशका मन्त्री, कर्मचारी भ्रष्टाचारमा संलग्न भएको देख्न नचाहेको उल्लेख गरे । भ्रष्टाचारका कारण देश झन् गरिबीतर्फ धकेलिएको दाबी गर्दै उनले मौलाएको भ्रष्टाचारले सबै नेपालीलाई असर गरेको तर्क गरे । व्यक्तिगत सम्पत्तिको मोह कायम रहेसम्म भ्रष्टाचार नियन्त्रण गर्न नसकिने चर्चा गर्दै उनले शिक्षा, स्वास्थ्य र रोजगारीको जिम्मा राज्यले लिए भ्रष्टाचार स्वत न्यूनीकरण हुने दाबी गरे । प्रदेश प्रमुख शेरचनले कुनै व्यक्ति सार्वजनिक ओहोदामा प्रवेश गर्दा र निँस्कदाको अवस्थामा सम्पत्ति छानबिन गर्नुपर्ने विचार राखे ।

गण्डकी प्रदेशका प्रमुख सचिव हरिप्रसाद बस्यालले अख्तियारले प्रदेश तथा स्थानीय सरकारलाई पठाएको ६१ बुँदे निर्देशनलाई सकारात्मक रुपमा लिँदै गण्डकी प्रदेश समन्वय परिषद बैठकले निर्देशन कार्यान्वयन गर्ने प्रतिबद्धता जनाए । उनले प्रदेश सरकार प्रति केन्द्रित ११ बुँदे सुझाव अक्षरंश समेटेर कार्यविधि निर्माण गर्न लागेको जानकारी दिए । भ्रष्टाचारका कारण राज्यले जनतालाई उपलब्ध गराउने सेवा, सुविधा सहज ढंगले पुग्न नसकेको उल्लेख गर्दै उनले यसले समाजमा असमानता, विकृति र विसंगति पैदा गरेको सुनाए ।

ट्रान्सपरेन्सी इन्टरनेसनल नेपालका पूर्व उपाध्यक्ष आनन्दराज मुल्मीले महालेखा परीक्षकको प्रतिवेदन अनुसार सरकारले काम नगरेको आरोप लगाए । उनले अख्तियारको कार्यक्षेत्र बढाएर सेना, निजी क्षेत्र र गैरसरकारी संस्थालाई समेत समेट्नुपर्ने सुझाव दिए । भ्रष्टाचार गर्ने तौर, तरिका र स्वरुप फेरिएकाले अख्तियारको पुरातन सोचलाई प्रविधिमा रुपान्तरण गर्नुपर्ने उनको भनाइ छ ।

कार्यक्रममा अख्तियार दुरुपयोग अनुसन्धान आयोग पोखरा कार्यालयका निमित्त प्रमुख शम्भु मिश्र, उपसचिव मेघनाथ रिजाल, नेपाल पत्रकार महासंघ कास्की अध्यक्ष दीपेन्द्र श्रेष्ठ, अख्तियारका लेखापाल देवेन्द्र पाण्डे लगायतले बोलेका थिए ।

समारोहमा पोखरा थियटरका कलाकारले भ्रष्टाचारविरुद्धमा सचेतनामूलक नाटक प्रदर्शन गरेका थिए । कार्यक्रममा अख्तियारले आयोजना गरेको वक्तृत्वकला प्रतियोगितामा द्वितीय भएकी एसओएस हर्मनमाइनरकी कक्षा १२ की छात्रा स्वस्ति बास्तोलाले आफ्नो प्रस्तुति राखिन् ।