समाधान संवाददाता
वालिङ

स्याङ्जाको गल्याङ नगरपालिका ३ वल्पुकका किसान च्याउ खेतीमा आकर्षित भएका छन् । यहाँका कृषकलाई समूह बनाएर च्याउको बिउ वितरण गरिएको थियो । वल्पुक कृषकसमूहमा आबद्व किसानलाई यसअघि गल्याङ नगरपालिकाले निशुल्क च्याउको बिउ वितरण गरेको थियो ।

कृषक समूहले च्याउ घरमा खानमात्रै नभई बिक्री वितरण गर्नसमेत थालेका छन् । ‘हामी यसबाट राम्रो उत्पादन गर्छाै । नगरपालिकाले दिएको सहयोगले व्यवसायिक कृषक बन्न प्रेरित गरेको छ’, समूहका अध्यक्ष नमकला बस्यालले बताइन् । १५ किसान गरेको समूहले अहिले व्यवसायिक रुपमा नै च्याउ खेती थालेको छ । उनीहरुलाई च्याउ उत्पादन गर्ने तरिका, रोग कीराबाट जोगाउने विधि र उत्पादनपश्चात बजारसम्म लैजाने प्रक्रियाको बारेमा प्रशिक्षण दिइएकोे कृषि शाखा प्रमुख शिव ढकालले बताए ।

गाउँघरमा यसै फालिने पराल र बाँझो जग्गा प्रयोग गरी मनग्ये आम्दानी गर्न सकिने ढकालले बताए । स्याङ्जामा कन्ये र सिताके च्याउको माग बढी छ । गल्याङ नगरपालिकाले कन्ये च्याउको बिउबिजन र प्राविधिक तालिम दिएपछि जिमुहा, तल्लो गल्याङ, गल्कोट लगायतका श्रेत्रमा सामूहिक च्याउ खेती गरिएको छ ।

गल्याङ नगरपालिकाले कृषि श्रेत्रलाई विकासको आधार मानेको नगर प्रमुख भूपराज अधिकारीले बताए । उत्साहित कृषकलाई कृषि श्रेत्रमा अनुदान, बिउबिजन र प्राविधिक सहयोग गर्दै आएको अधिकारीले बताए ।