समाधमान संवाददाता, पोखरा

पोखराको लेखनाथमा विशिष्टीकृत बाल अस्पताल खोल्न लागेका डा. भगवान कोइरालाको अभियानलाई राष्ट्रिय वाणिज्य बैंक लिमिटेडले ५० लाख रुपैयाँ आर्थिक सहयोग गरेको छ । कोइरालाले नाफा नलिने कम्पनीमार्फत ७ वटै प्रदेशमा अस्पताल खोल्न लागेका छन् । त्यसको सुरुआत उनले गण्डकी प्रदेशबाट गर्दैछन् ।

डा कोइरालाले बाल अस्पताल खोल्ने अभियानका क्रममा काठमाडौं इन्स्टिच्युट अफ चाइल्ड हेल्थ (किओच) स्थापना गरेका छन् । ७ वटै प्रदेशका अस्पताल किओच अन्तर्गत हुनेछन् । वाणिज्य बैंकले अस्पताल भवन निर्माणका लागि किओचलाई ५० लाख रुपैयाँ सहयोग हस्तान्तरण गरेका हो ।

सहयोग सम्बन्धी सम्झौतामा बैंकका प्रमुख कार्यकारी अधिकृत किरणकुमार श्रेष्ठ र किओचका संस्थापक अध्यक्ष प्रा.डा.भगवान कोइरालाले बुधबार काठमाडौंमा हस्ताक्षर गरे । हस्ताक्षर कार्यक्रममा बैंक सञ्चालक समितिका अध्यक्ष निर्मलहरि अधिकारीले ५० लाख रुपैयाँको चेक किओचका संस्थापक अध्यक्ष प्राडा भगवान कोइरालालाई हस्तान्तरण गरेका थिए ।

किओचका संस्थापक अध्यक्ष प्राडा भगवान कोइरालाले हाल मुलुकभर करिब १ करोड २० लाख बालबालिका भएको र स्वास्थ्य उपचारको अवस्था कमजोर रहेकोमा बैंकको सिएसआरको पैसा बालबालिकाको उपचार हुने अस्पतालमा प्रयोग हुनु पुण्य कार्य भएको र यस्ता सहयोगले अधुरा परियोजनाहरु सञ्चालनमा ल्याउन सघाउ पुग्ने बताए ।

काठमाडौं इन्स्टिच्युट अफ चाइल्ड हेल्थ(किओच) बाल स्वास्थ्यको क्षेत्रमा बहुविशिष्टीकृत एउटा अस्पलाल सञ्चालन गर्ने, तालिम प्राप्त दक्ष जनशक्ति तयार गर्ने, गुणस्तर वृद्धि गर्ने, नियमनका विधि र प्रक्रियाको विकास गर्ने, नीति निर्धारण गर्ने लगायतका कार्य गर्ने गरी सबै प्रादेशिक बाल अस्पलातहरुका लागि स्रोत केन्द्रको रुपमा केन्द्रीय बाल अस्पताल सञ्चालन गर्ने गरी स्थापना भएको बाल अस्पताल हो । काठमाडौंको बुढानीलकण्ठमा केन्द्रीय अस्पतालको रुपमा स्थापना हुने यो बाल अस्पताल मुनाफारहित कम्पनीको रुपमा रहने र देशका सातै प्रदेशमा सञ्चालन हुनेछ ।