समाधान संवाददाता, पोखरा

पोखरा प्राइम एसेन्स प्रालिको ३३ लाख ६० हजार रुपैयाँ लिएर १ कर्मचारी फरार भएका छन् । रकम लिएर कर्मचारी सम्पर्कविहीन भएको जिल्ला प्रहरी कार्यालय कास्कीमा उजुरी परेको छ ।

प्राइम एसेन्स प्रालिले पोखरा न्युरोडमा एनसेल डिलरको काम गर्दै आएको छ । प्रालिका कर्मचारी राजकुमार गिरी रकम लिएर सम्पर्कविहीन भएको जिल्ला प्रहरी कार्यालय कास्कीका प्रवक्ता डिएसपी राजकुमार केसीले जानकारी दिए । उनी शुक्रबार बिहान ११ बजे बैंकमा पैसा राख्न प्रालिबाट निस्केको सिसिटिभी भिडियोमा देखिन्छ ।

बैंकमा पैसा जम्मा नगरेकाका गिरी सम्पर्कमा नआएपछि शुक्रबार दिउँसो २ बजेतिर प्रालिका कर्मचारीले प्रहरीलाई खबर गरेका थिए । गिरीलाई खोज्ने प्रहरी उनको कोठासम्म गएको थियो । गिरी भने बिहीबारै मासबारबाट कोठा सरेर छोरेपाटन गएका थिए । प्रालिको कमजोरीका कारण पनि गिरीलाई सम्पर्कविहीन हुन सजिलो भएको डिएसपी राजकुमार केसीले बताए । उनले कम्पनीले गिरीको स्थायी ठेगाना वा ३ पुस्ते नराखेका कारण उनको खोजीका लागि समस्या भएको उल्लेख गरे ।