ईश्वर देवकोटा, समाधान

गण्डकी प्रदेश सरकारले सम्भावित कोरोना संक्रमित बिरामीलाई उपचारको लागि भन्दै पोखरा ३० मोहरियास्थित लेखनाथ सामुदायिक लायन्स अस्पताललाई थप व्यवस्थापनसहित सञ्चालन गर्ने भएको छ । विश्व स्वास्थ्य संगठन (डब्लुएचओ) ले नेपालमा पनि कोरोना भाइरस (कोभिड–१९) संक्रमणको उच्च जोखिममा रहेको चेतावनी दिएसँगै सरकारले जारी गरेको ‘हाइ अलर्ट’ अनुसार प्रदेशले पूर्व तयारी थालेको हो ।

तत्काललाई कोरोना संक्रमित बिरामीलाई उपचारका लागि आइसोलेसनका रुपमा उक्त अस्पतालाई उपयोग गर्ने शुक्रबार बसेको मन्त्रिपरिषद बैठकबाट निर्णय भएको सामाजिक विकास मन्त्री नरदेवी पुनले जानकारी दिइन् । ‘अस्पताल सञ्चालक समितिसँगको समन्वयपछि अहिलेलाई आइसोलेसनका रुपमा सञ्चालन गर्ने भएका छौं,’ मन्त्री पुनले भनिन्, ‘अहिले नै ६० शड्ढयासम्म सञ्चालन गर्न सकिने देखिएको छ ।’ प्रदेशमा छुट्टै सरुवा रोगसम्बन्धी अस्पताल निर्माण गर्ने छलफल चलिरहेकाले उक्त अस्पताललाई नै प्रक्रियागत रुपमा विकास गर्न सकिने मन्त्री पुनले जानकारी दिइन् । ‘तत्कालका लागि कोरोना लक्षित अस्पतालका रुपमा सञ्चालनमा ल्याउने र बाँकी सबै प्रक्रिया पूरा गरेपछि मात्र थप सञ्चालनको टुंगो लाग्छ,’ उनले भनिन् ।

अस्पतालमा हाल ५१ शड्ढया उपलब्ध छ । १ डाक्टर, ४ मेडिकल अफिसरसहित ४० जनाको जनशक्ति अस्पतालमा छ । आइसोलेसनको रुपमा सञ्चालन गर्दा आवश्यक सबै तयारी पूरा गर्ने प्रतिबद्धता प्रदेश सरकारबाट प्राप्त भएपछि आपत्को अवस्थामा सहयोग गरेको सञ्चालक समितिका अध्यक्ष रमानाथ पौडेलले जानकारी दिए । ‘यहाँको जनशक्ति आवश्यक पर्ने हकमा तालिम र सुरक्षा प्रबन्ध गरेर मात्र परिचालन गर्न भनेका छौं,’ उनले भने, ‘समग्र समुदायलाई पनि संक्रमणबाट सुरक्षित राख्न अस्पताल र समुदायको तर्फबाट सरकारसामु हाम्रा कुरा राखेका थियौं ।’ अस्पताललाई नै प्रदेशको स्वामित्वमा लैजाने पक्षमा भने प्रस्ताव नआएकाले छलफल नभएको उनले बताए ।

अस्पताल आकस्मिक सेवासहित सञ्चालनमा छ । ४ आइसियु, १ भेन्टिलेटर बेड उपलब्ध रहेको अध्यक्ष पौडेलले जानकारी दिए । ०६० सालदेखि ०६२ सम्म महायज्ञ चलाएर समुदायका दाताले जोहो गरेको अर्थबाट अस्पताल सञ्चालनमा आएको थियो ।