काठमाडौं

चौतर्फी घेराबन्दीका कारण अप्ठेरोमा परेका नेपाल कम्युनिष्ट पार्टीका अध्यक्ष तथा प्रधानमन्त्री केपी शर्मा ओली र वरिष्ठ नेता माधवकुमार नेपालबीच सोमबार बिहान भेटवार्ता भएको छ।

प्रधानमन्त्री निवास बालुवाटारमा २ नेताबीच झन्डै एकघन्टा एक्लाएक्लै कुराकानी भएको बालुवाटार स्रोतले जनाएको छ।

नेकपाका अर्का अध्यक्ष पुष्पकमल दाहाल, बरिष्ठ नेता नेपाल लगायतका नेताहरुबीचको भेटघाट प्रधानमन्त्री ओलीविरुद्धको मोर्चामा केन्द्रित भएपछि सशंकित भएका ओलीले नेपाललाई फकाएर आफ्नो पक्षमा ल्याउने प्रयास स्वरुप भेटघाट गरेका हुन्।

दाहाल, नेपाललगायतका नेताहरु ओलीले प्रधानमन्त्री र पार्र्टी अध्यक्ष दुवैबाट राजीनामा दिनुपर्ने दबाब दिँदै आएका छन् भने ओली प्रधानमन्त्री पद छाडे पनि अध्यक्ष छाड्न तयार छैनन्।

अर्का अध्यक्ष दाहालले नेता नेपाललाई प्रधानमन्त्रीमा अघि सार्न खोजेको बुझेपछि ओलीले नेपाललाई आफ्ना पक्षमा रहेको देखाउनका लागि आफैले प्रधानमन्त्रीको प्रस्ताव गरेको बताइएको छ।