समाधान संवाददाता

धुलिखेल अस्पतालमा बिहीबार निधन भएकी सुत्केरी महिलाबारे स्वास्थ्य तथा जनसंख्या मन्त्रालयले आफ्नो आधिकारिक धारणा थप परीक्षण पछि मात्र सार्वजनिक गर्ने भएको छ ।

उनको निधन कोरोना भाइरसकै कारण भए नभएको पत्तो लगाउन थप परीक्षण भइरहेको मन्त्रालयका प्रवक्ता डा विकास देवकोटाले नियमित प्रेस बिफ्रिङ मार्फत जानकारी दिए ।

कोरोना भाइरसकै कारण उनको मृत्यु भएको भन्नेबारे विभिन्न सञ्चार माध्यममा खबर आइरहेका छन् ।

प्रवक्ता डा देवकोटाका अनुसार सिन्धुपाल्चोक निवासी २९ वर्षीया ति महिला वैशाख २३ गते त्रिवि शिक्षण अस्पतालमा भर्ना भएकी थिइन । २४ गते उनको नर्मल सुत्केरी भएको थियो । २५ गते डिस्चार्ज भएको उनले बताए ।

डिस्चार्ज भई सिन्धुपाल्चोक घरमा गएकी महिलामा ज्वरो, श्वासप्रश्वासको समस्या देखिएको थियो । स्थानीय अस्पतालहरुमा उपचार गराइरहेको र स्वास्थ्य अवस्था जटिल भएपछि थप उपचारको लागि धुलिखेल अस्पतालमा आउँदै गर्दा निधन भएको उनले जानकारी दिए । ‘यससम्बन्धमा थप विवरण लिइरहेको र कोरोना सम्बन्धी परीक्षणहरु भइरहेको छ,’ प्रवक्ता डा देवकोटाले भने, ‘थप परीक्षणको विवरण प्राप्त भए पछि मात्र स्वास्थ्य मन्त्रालयले निक्र्यौल गरेर प्रसारण गर्ने छ ।’