समाधान संवाददाता
पोखरामा १ व्यक्तिको हत्या गरेर शव गाडेको आरोपमा ४ जनालाई कास्की प्रहरीले पक्राउ गरेको छ । पोखरा १४ समिन तारास्थित २२ वर्षीय विमल रानाभाटलाई घनले प्रहार गरी बारीमा गाडेको आरोपमा उनीहरु जेठ २ गते पक्राउ परेका हुन् ।

पक्राउ पर्नेमा सोही ठाउँका ज्ञानबहादुर परियार, १८ वर्षीय सञ्जय दर्जी, १८ वर्षीय कुमार परियार र बागलुङ घर भएका १९ वर्षीय सागर परियारलाई पक्राउ गरेको गण्डकी प्रदेश प्रहरी कार्यालयका प्रहरी नायव उपरीक्षक राजेन्द्रबाबु रेग्मीले जानकारी दिए ।

प्रहरीका अनुसार १ महिनाअघि रानाभाटलाई घनले प्रहार गरी हत्या गरेर ज्ञानबहादुर परियारले आफ्नै घर पछाडि बारीको डिलमा गाडेका थिए । शुक्रबार कास्की प्रहरी प्रमुख एसपी दानबहादुर कार्कीको कमान्डमा खटिएको टोलीले शव सडेको अवस्थामा सोही ठाउँमा फेला पारेको थियो ।

घटनाका ओरापितलाई पक्राउ गरी थप अनुसन्धान गरिरहेको प्रदेश प्रहरी कार्यालयका डिएसपी रेग्मीले जानकारी दिए ।