समाधान संवाददाता

पेट दुखेर पोखरा गैह्रापाट स्थित फिस्टेल हस्पिटलमा गएकी एक महिलाको दुखाई कम गर्ने इन्जेक्सन लगाउना साथ मृत्यु भएको छ । मृतकका आफन्तले सुई लगाउना साथ कसरी मृत्यु भयो भन्दै कारण मागेका थिए।

मृतकका आफन्त, चिकित्सक र अस्पताल प्रशासनबीच वार्ता भएकाे थियाे । वार्तामा अस्पतालले आकस्मिक कक्षमा उपचारकाे प्रयास गरेकाे बताएकाे छ ।

फिस्टेल हस्पिटलमा रहेका मृतक परिवारका साथीले समाधानलाई बताएको घटना बिवरण जस्ताको तस्तै

पोखरा महानगरपालिका वडा नम्बर ४ सिदार्थचोककी ३९ बर्षीया मिरा पोखराका व्यवसायीका नेता प्रदिप मुल्मीकी श्रीमती हुन । प्रदिप फेन्सी तथा रेडिमेड व्यवसायी संघ कास्कीका अध्यक्ष हुन ।

सधै जसो शुक्रबार विहान पनि प्रदिप र मिरा ‘मर्निङ वाक’ गए । फर्केर ब्याडमिण्टन खेले । मिराले खाना पकाईन । मिरा एक छोरा र एक छोरी आमा हुन । सपरिवार खाना खाए ।

खाना खाएपछि मिरालाई पेट दुख्न थाल्यो । धेरै नै पेट दुखेपछि प्रदिपले गाडी चलाएर मिरालाई फिस्टेल हस्पिटलमा लगे । दुखाई कम गर्न भन्दै इर्मजेन्सी वार्ड मै मिरालाई एउटा इन्जेक्शन दिइयो । इन्जेक्शन लगाएको केही मिनेट पछि मिराको मृत्यु भयो ।

मिराका श्रीमान प्रदिपले इन्जेक्शन लगाउना साथ किन मृत्यु भयो भन्दै अस्पतालसंग जवाफ मागेका थिए ।

चिकित्सकले अस्पतालले उपचारमा कमजाेरी नगरेकाे उपचार सही नै भएकाे भन्दै सम्झाएपछि आफन्तले शव बुझेका छन ।