समाधान संवाददाता
कास्कीको अन्नपूर्ण गाउँपालिका लेबाडेस्थित चिल्ड्रेन नेपालका बालबालिकालाई स्वास्थ्य तथा खेलकूद सामग्री वितरण गरिएको छ । पोखरा गैह्रापाटनस्थित लेबल नेक्स्ट कम्पनीले उनीहरुलाई उक्त सामग्री उपलब्ध गराएको हो ।

स्यानिटाइजर, मास्क र खेलकूद सामग्री वितरण गरिएको कम्पनीका शिशिर शर्माले जानकारी दिए । बालबालिकालाई कोरोना भाइरसको सचेतनाबारे जानकारी दिइएको उनले बताए । उनीहरुलाई हात धुने विधि सिकाइएको थियो ।

लकडाउनपछि सडकमै अलपत्र परिरहेका बालबालिकालाई पोखरा महानगर र कास्की प्रहरीको समन्वयमा विभिन्न स्थानबाट उद्धार गरी चिल्ड्रेन होममा व्यवस्थापन गरेको थियो । होममा हाल १८ बालबालिका छन् ।

उनीहरुको शारीरिक अवस्थासाथै मनोवैज्ञानिक अवस्था सुधारका लागि विभिन्न परामर्शका कार्यक्रमहरु गरिरहेको चिल्ड्रेन नेपालका सहायक संयोजक सूर्यप्रसाद पौडेलले जानकारी दिए । विभिन्न खेलकूद तथा चित्रकलाका माध्यमबाट सिकाइलाई प्राथमिकता दिइरहेको उनले बताए ।