समाधान संवाददाता
पोखरा

जिल्ला जिल्लामा संकलित स्वाबका नमुनाको थुप्रो लागेको गुनासो आएपछि गण्डकी प्रदेशका मुख्यमन्त्री पृथ्वीसुब्बा गुरुङले आइतबार आकश्मिक रुपमा प्रयोगशालाको अनुगमन गरेका छन् ।

कोरोना संक्रमणको दर बढ्दै गएको, भारतबाट फर्केर पालिकाका क्वारेन्टाइनमा बसेकाहरुको स्वाब परीक्षण रिपोर्ट समयमै नआएका कारण खर्च बढेको जस्ता गुनासा आएपछि उनी अनुगमनका लागि गएका हुन् ।

सामाजिक विकास मन्त्रालयसँग समन्वय गरेर जनशक्ति पूर्ति गरेर क्षमता अनुसारका काम गर्न निर्देशन दिँदै मुख्य मन्त्रीले काठमाडौंबाट थप दक्ष जनशक्ति ल्याउने बारेमा समेत तयारी भइरहेको जानकारी गराए ।

उनले प्रदेश स्वास्थ्य निर्देशक विनोदविन्दु शर्मा, प्रदेश जनस्वास्थ्य प्रयोगशाला निमित्त प्रमुख सपना सुवेदी लगायतसँग मुख्यमन्त्रीले जानकारी लिएका हुन् । अहिले प्रदेशको प्रयोगशालमा २ हजार ६ सय भन्दा बढी नमुना संकलित छन् ।

प्रदेश सरकारले आइतबारबाट नयाँ पिसिआर मेसिन सञ्चालनमा ल्याए पनि आवश्यक जनशक्ति नहुँदा क्षमता अनुसारको परीक्षण हुन नसकेको प्रयोगशालाकी निमित्त निर्देशक सुवेदीले जानकारी गराइन् ।

२ वटा मेसिन चलाउन १ सिफ्टमा कम्तीमा पनि १८ जना कर्मचारी चाहिन्छन् । तर अहिले त्यो अनुसार कर्मचारी छैनन् । सामाजिक विकास मन्त्रालयले जिल्लाहरुबाट ल्याबका कर्मचारी काजमा बोलाएको छ । बोलाएका ती कर्मचारी आएर तालिम गरेर काममा खटिन पनि ४÷५ दिन लाग्छ ।

२ सिफ्टका लागि ३६ जना चाहिने भए पनि ती कर्मचारी आए भने २३ जना पुग्छन् । त्यति हुँदा पनि जनशक्ति नपुग्ने सुवेदीले मुख्य मन्त्रीलाई जानकारी गराइन् । जनशक्ति पूर्ति भएपछि मात्र क्षमता अनुसार २ मेसिनले दैनिक ५ सय वटासम्म नमुना परीक्षण गर्न सक्छन् ।