विकास रोकामगर
पोखरा, गण्डकी मेडिकल कलेजका विद्यार्थीले रिले अनसन थालेका छन् । सरकारले तोकेको शुल्कमै आफूहरुले पढ्न पाउनुपर्ने, बढी लिइएको शुल्क तत्काल फिर्ता गर्नुपर्ने र आफूहरुले बुझाएको शुल्कको बिल पाउनु पर्ने विद्यार्थीको छ । आन्दोलन थालेको लामो समय भइसक्दा पनि प्रशासनले कुनै चासो नदेखाएको भन्दै आइतबारदेखि उक्त मेडिकलमा अध्ययनरत विद्यार्थीले रिले अनसन सुरु गरेका हुन् ।
अस्पतलाका विद्यार्थी १० दिनदेखि आन्दोलनमा छन् । यसअवधिमा ४ पटकसम्म अस्पताल प्रशासन र आन्दोलनरत विद्यार्थी पक्षबीच वार्ता पनि भइसकेको छ । आधारातसम्म बसेको वार्ताले बाटो नदेखाउँदा र कक्षाकोठामा १७ र ओपिडीमा माघ २२ गतेदेखि तालाबन्दी छ ।
प्रशासनले वार्तामा बोलाउने तर सहमति बिनै झुलाइरहेको आरोप लगाउँदै विद्यार्थीले माग पूरा नभएसम्म रिले अनसन सुरु गरेका छन् । ‘हामीले मागेका माग पूरा गर्नतिर लाग्छौं भन्नुहुन्छ । बढी लिएको शुल्क र बिल माग्दा फिर्ता हुँदैन, अब कार्यान्वयन गर्छौं भन्नुहुन्छ,’ मेडिकल विद्यार्थी प्रवीण गौतमले भने ।
कलेजको प्रशासनबाट फोन गरेर आन्दोलन छोड्न धम्की दिने गरेकोसमेत विद्यार्थीको गुनासो छ । सन् २०१५ देखियताका ब्याचका विद्यार्थी बढी शुल्क लिएको भन्दै विरोधमा उत्रिएका हुन् । विद्यार्थीले यस्तै आन्दोलन यसअघि पनि गरेका थिए । यसअघि बढी लिएको शुल्क फिर्ता गर्ने लगायत सहमतिमा आन्दोलन सकिएको थियो । सहमतिबेगर उल्टै अतिरिक्त शुल्क लिने र बिल पनि नदिने गर्ने काम भइरहेकाले फेरि आन्दोलनमा उत्रनुपरेको विद्यार्थी रविना मिश्रले बताइन् ।