समाधान संवाददाता

पश्चिमाञ्चल क्षेत्रीय खेलकुद विकास समितिका निर्देशक एवं बरिष्ठ बक्सिङ प्रशिक्षक विद्या मर्सानी सेवा निवृत्त भएका छन् ।

२०४२ सालमा बक्सिङ खेलको प्रशिक्षकको रुपमा खेलकुद विकास समितिमा प्रवेश गरेका मर्सानीले ३५ बर्ष खेलकुदको विकासमा समर्पित गरे । उनले उमेरका कारण अनिवार्य अवकास पाएका हुन् ।

क्षेत्रीय खेलकुद विकास समिति पोखराले आइतबार प्रशिक्षक मर्सानीको सम्मानमा विदाई कार्यक्रम आयोजना गर्यो । सो कार्यक्रममा बोल्दै मर्सानीले जीवनको पुरै आधा समय खेलकुद मै समर्पित गरेको स्मरण गरे ।

उनले सेवानिवृत भएपनि खेलकुदबाट टाढा रहन नसक्ने बताए । ‘पोखरा रंगशालाको ढुङ्गामाटोले पनि मलाई चिनेको छ जस्तो लाग्छ । खेलकुद र पोखरा रंगशालाको विकासमा सक्दो सहयोग गरिहनेछु ।’ उनले भने ।

विदाई समारोहमा बोल्दै राष्ट्रिय खेलकुद परिषदका बोर्ड सदस्य राजेश गुरुङले विद्या गुरुले नै आफुलाई खेल क्षेत्रमा प्रवेश गराएका बताए । गुरुङ बक्सिङका खेलाडी थिए । विद्याकै प्रशिक्षणमा उनले विभिन्न प्रतियोगितिामा भाग लिएको स्मरण गरे ।

उनले विद्या गुरुको योगदान खेल क्षेत्रले कहिले भुल्न नसक्ने बताउदै आगामी दिनमा पनि गुरुको सल्लाह र सुझावबाटै खेलकुद गतिविधि सञ्चालन गरिने बताए ।