एसके थकाली
जोमसोम

मुस्ताङको थासाङ गाउपालिका—२ नाउरिकोटमा २ तले कच्ची घर भत्किँदा १ जनाको मृत्यु भएको छ भने १ जना गम्भीर घाइते भएका छन् ।

जिल्ला प्रहरी कार्यालय मुस्ताङका अनुसार अविरल वर्षाले सोमबार बिहानपख करिब साढे ४ बजे नाउरिकोटका ७० वर्षीय रत्नप्रसाद गौचनको ढुंगा र माटोले बनेको २ तले घर भत्किएको हो ।

मुस्ताङका प्रहरी नायव उपरीक्षक नविनकृष्ण भण्डारीका अनुसार घर भत्किँदा १८ वर्षे निशान तुलाचनको घटनास्थलमै मृत्यु भएको छ । उनका हजुरबुवा रत्नप्रसाद घाइते छन् । उनको लेते प्राथमिक स्वास्थ्यचौकीमा उद्धार भइरहेको छ ।

घटनाको खबर पाएलगत्तै जिल्ला प्रहरी कार्यालय मुस्ताङबाट प्रहरी नायव उपरीक्षकको कमाण्डमा ७ जना र कोवाङ प्रहरी चौकीबाट प्रहरी सहायक निरीक्षकको कमान्डमा ५ जनाको टोली घटनास्थलमा पुगेको थियो ।

मुस्ताङका सहायक प्रमुख जिल्ला अधिकारी जगदिश अर्याल, थासाङ गाउँपालिकाका अध्यक्ष बुद्धिप्रसाद शेरचन, वडाध्यक्ष नरप्रसाद हिराचन र प्रमुख प्रशासकीय अधिकृत सन्तोष केसी लगायतको टोली समेत घटनास्थलमा पुगेर छ ।