समाधान संवाददाता

पोखरा उद्योग वाणिज्य संघले आफ्नो ६५ औं वार्षिकोत्सवको अवसरमा आयोजना गरिएको व्यवसाय व्यवस्थापन विषयक ५ दिने तालिम बुधबार सकिएको छ । तालिममा पोखराका विभिन्न व्यवसायिक संस्थाका १६ जना जनाको सहभागिता थियो । तालिम व्यवसाय विस्तार, व्यवसाय र बजारीकरणमा नयाँ प्रविधि तथा सीप प्रयोगमा केन्द्रित थियो ।

समापन कार्यक्रममा संघका कार्यवाहक अध्यक्ष नारायण कोइरालाले तालिमलाई व्यवसाय बिस्तारमा लगाउन आग्रह गरे । ‘सामान उही भए पनि त्यसलाई तलमाथि गरेर सजावट परिवर्तन गर्दा ग्राहक आकर्षित हुन्छन्’, कोइरालाले भने, ‘तालिमले पनि आफूले थाहा पाइरहेको विषयलाई नयाँ तरिकाले प्रयोग गर्न सिकाउँछ ।’ कार्यवाहक अध्यक्ष कोइरालाले बजारमा भित्रिएका विज्ञापनका नयाँ शैली, प्रविधिको प्रयोग तथा नयाँ व्यवसायका सम्भावनाबारे पनि व्यवसायीले ध्यान दिनुपर्नेमा जोड दिए ।

संघका महासचिव अर्जुन पोखरेलको सञ्चालन रहेको कार्यक्रममा कोषाध्यक्ष सुरेन्द्रमान बिजुक्छे र प्रशिक्षक रामप्रसाद तिवारीले पनि सहभागीलाई प्रमाणपत्र वितरण गरे । तालिमका प्रशिक्षक तथा आयोजक संस्था औद्योगिक व्यवसाय विकास प्रतिष्ठान पोखराका प्रमुख रामप्रसाद तिवारीले सिकेका कुरा व्यवहारमा उतार्न आग्रह गरे ।