समाधान संवाददाता, पोखरा

पोखरा ३२ लामेआहाल पृथ्वीराजमार्गसँगै जोडिएको प्रतीक्षालयमा सोमबार बिहान मृत भेटिएकी महिलाको पहिचान प्रहरीले खुलाएको छ ।

मृत महिला तनहुँ शुक्लागण्डकी नगरपालिका ८ बस्ने अन्दाजी ५० वर्ष की सीता परियार रहेको कास्की प्रहरीले जानकारी दिएकाे छ ।

महिलाको पहिचान खुलेसँगै थप अनुसन्धान अघि बढाइएको जिल्ला प्रहरी कार्यालय कास्कीका प्रवक्ता तथा डिएसपी सुवास हमालले बताए ।

‘घरबाट खुट्टाको घाउकाे उपचार गर्न जान्छु भनेर निस्किएको बुझिएको छ,’ उनले भने, ‘परिवार सम्पर्कमा आएका छन्, थप अनुसन्धान भइरहेको छ ।’

परियारको शव प्रतीक्षालयमा कपडाले बेरिएको अवस्थामा देखेपछि प्रहरीलाई खबर पुगेको थियो । अनुसन्धानमा खटिएका प्रहरीका अुनसार महिलाको मुख र नाकमा रगत देखिएको थियो । बाहिरी चोट भने नदेखिएको उनले बताएका थिए ।

शव पोस्टमार्टमका लागि सोमबारै अस्पताल पठाइसकिएको छ । घटनाको प्रकृतिबारे प्रहरीले बताइसकेको छैन ।