समाधान संवाददाता, पोखरा

गण्डकी प्रदेश सभाका सदस्य मीना गुरुङले जन्मदिनको अवसरमा सडक बालबालिकालाई ट्र्याकसुट वितरण गरेकी छन् ।

पोखरा महानगरपालिकाले संरक्षण गर्दै आएको सडक बालबालिकालाई उनले १८ थान ट्र्याकसुट वितरण गरेकी हुन् ।

कास्कीको अन्नपूर्ण गाउँपालिका १ लेवाडेमा भएको कार्यक्रममा हङकङ ब्युटी इन्स्टिच्युट सञ्चालक एवं राष्ट्रिय सौन्दर्यकर्मी युनियनका संस्थापक अध्यक्ष समेत रहेकी गुरुङले समाजमा थोरै भए पनि योगदान पु¥याउन बालबालिकाहरुको लागि सहयोग गरेको बताइन् ।

उनले प्रदेश सरकार र पोखरा महानगरले सडक बालबालिकाको रेखदेख र संरक्षण गरेको उल्लेख गरिन् ।

उनले प्रदेश सभाको सदस्यका हिसाबले पाउने तलब सामाजिक काममा खर्च गर्ने बताइन् ।

अन्नपूर्ण गाउँपालिका अध्यक्ष युवराज कुँवरले मीना गुरुङको समाजलाई सकारात्मक सन्देश दिने सामाजिक काम सबै जनप्रतिनिधिहरुले अनुकरण गर्नु पर्ने बताए ।

राष्ट्रिय सौन्दर्यकर्मी युनियन अध्यक्ष सुमन गुरुङले सामाजिक क्षेत्रमा जनप्रतिनिधि गुरुङको योगदान रहेको दाबी गरिन् ।

लकडाउन बेला पोखरा महानगरपालिकाले पोखरा सडक बालबालिकालाई अन्नपूर्ण–१ स्थित लेबाडेमा चिल्ड्रेन नेपालको भवनमा व्यवस्थापन गरेको आएको चिल्ड्रेन नेपालका निर्देशक रामचन्द्र पौडेलले बताए । हाल त्यहाँ ११ जिल्लाका ३ बालिकासहित १८ जना छन् ।