समाधान संवाददाता, पोखरा

गण्डकी प्रदेशमा कोरोनाबाट मृत्यु हुनेको संख्या ५० पुगेको छ ।

पछिल्लोपटक शुक्रबार राति पोखरा महानगरपालिका ३ बस्ने ५६ वर्षीया महिलाको पश्चिमाञ्चल क्षेत्रीय अस्पतालको प्रिआइसोलेसनमा मृत्यु छ ।

मृत्युपछि शनिबार उनको कोरोना रिपोर्ट पोजेटिभ आएको अस्पतालका निर्देशक सहप्राडा अर्जुन आचार्यले जानकारी दिए ।

कोरोनासँग मिल्दोजुल्दो लक्षण देखिएपछि उनलाई प्रिआइसोलेसनमा राखिएको थियो । त्यहीँबाट स्वाब संकलन गरेर पठाइयो ।

स्वाब संकलन गरेकै दिन शुक्रबार राति उनको मृत्यु भयो । शनिबार दिउँसोमात्रै कोरोना पोजेटिभ भएको रिपोर्ट आयो ।

ती महिलामा निमोनिया, उच्च रक्तचाप र श्वासप्रशवासको समस्या थियो ।

योसहित कास्कीमा कोरोना संक्रमणबाट ज्यान गुमाउनेको संख्या १५ पुगेको छ ।

कास्कीबाहेक नवलपुर र तनहुँका ९/९, गोरखाका ७, स्याङ्जाका ५, लमजुङ र बागलुङका २ र म्याग्दीका १ जना छन् ।

गण्डकीमा ५६ सय ३३ जनामा कोरोना पुष्टि भएको छ । तीमध्ये ३५ सय १० जना निको भएका छन् ।