समाधान संवाददाता
पोखरा

गण्डकी प्रदेश सभामा निर्वाचित नेपाली कांग्रेसका सांसदहरुले दसैं खर्च फिर्ता गरेका छन् । कांग्रेस संसदीय दलको मंगलबार पोखरामा बसेको बैठकले दसैं खर्च फिर्ता गर्ने निर्णय गरेको संसदीय दलका प्रमुख सचेतक मणिभद्र शर्मा कँडेलले बताए ।

मुलुक कोरोनाको महामारीमा परेको संघ सरकारले उपचार गर्न सक्दिन भनेर हात उठाएका बेला नागरिकको चित्त दुखाएर दसैं खर्च खान उचित नहुने भएकाले यस्तो निर्णय गरिएको प्रमुख सचेतक शर्माले बताए ।

६० सदस्यीय गण्डकी प्रदेश सभामा प्रत्यक्ष र समानुपातिक गरी नेपाली कांग्रेसका १५ सांसद छन् ।

कांग्रेस सांसदले कोरोना महामारीको अवधिभरको यातायाता खर्च नलिने निर्णय यसअघि नै गरेका थिए ।

कांग्रेस सांसद एवं सार्वजनिक लेखा समिति सभापति कुमार खड्काले असोज मसान्तसम्म यातायात सुविधा समेत नलिने भन्दै गाडी र चालक प्रदेश सभा सचिवालयलाई बुझाएका छन् ।