समाधान संवाददाता, पोखरा

गण्डकी प्रदेशमा ६१ जनामा कोरोना भाइरस संक्रमण पुष्टि भएको छ । प्रदेशका ७ जिल्लामा ६१ संक्रमित थपिएका हुन् ।

थपिनेमा कास्कीका ३८ जना छन् । गोरखामा ७, तनहुँमा ६, लमजुङमा ५, स्याङ्जामा ३ संक्रमित थपिँदा बागलुङमा १ जनामा संक्रमण पुष्टि भएको छ ।

प्रदेशमा कोरोना संक्रमितको संख्या १३ हजार ५ सय ८३ पुगेको छ । त्यसमध्ये ११ हजार ७ सय ६५ संक्रमित निको भएका छन् ।

बुधबार थप २ संक्रमितको मृत्यु पुष्टि भएको छ । स्वास्थ्य निर्देशनालय, गण्डकीका अनुसार कास्कीका २ संक्रमितको मृत्यु भएको हो ।

पोखरा १२ का ८४ वर्षीय कोरोना संक्रमित पुरुषको मंगलबार बिहान ५ः४५ बजे पोखरास्थित फिस्टेल अस्पतालमा मृत्यु भएको हो । मंसिर २३ गते कोरोना संक्रमण पुष्टि भएका उनमा निमोनियाको समस्या थियो ।

यसैगरी पोखरा १ का ७६ वर्षीय पुरुषको पनि कोरोना संक्रमणबाट मृत्यु भएको छ । उनको मंगलबार राति १०ः२० बजे पोखरास्थित फिस्टेल अस्पतालमा मृत्यु भएको हो ।

यससँगै गण्डकी प्रदेशमा कोरोनाका कारण मृत्यु हुनेको संख्या १ सय ८६ पुगेको छ ।