समाधान सम्वाददाता, पोखरा ।

एमाले नेता पृथ्वीसुब्बा गुरुङ नेतृत्वको गण्डकी प्रदेश सरकार ढालेर नयाँ सरकार गठनका लागि अगुवाई गरिरहेको प्रमुख प्रतिपक्ष दल नेपाली कांग्रेस केही समय ‘पर्ख र हेर’को स्थितिमा फर्केको छ ।

सोमबार दिउसो सम्पन्न नेपाली कांग्रेस गण्डकी प्रदेश सभाको संसदीय दलको बैठकले यस्तो निष्कर्ष निकालेको हो । राष्ट्रिय जनमोर्चाको औपचारिक निर्णय नआउन्जेलसम्म जस्ता गतिविधि गरे पनि अर्थ नरहने भन्दै बैठकले राजमो कै निर्णय पर्खने निष्कर्ष निकालेको हो ।

यसअघि नयाँ सरकार गठनका लागि दलहरुसंग सम्वाद गर्न कांग्रेसले प्रदेश सांसद कुमार खड्काको नेतृत्वमा अन्तरपार्टी वार्ता समिति गठन गरेको थियो । मणिभद्र शर्मा कँडेल र विन्दु थापा सदस्य रहेको ३ सदस्यीय वार्ता समितिले अहिलेसम्मको प्रगति र प्रयासका बारेमा संसदीय दलको बैठकलाई औपचारिक जानकारी गराएको थियो ।

शनिबार राजमोका अध्यक्ष चित्रबहादुर केसीले सरकार दिएको समर्थन फिर्ता लिने र अविश्वासको प्रस्तावमा हस्ताक्षर गर्ने कुरा समाधान दैनिकलाई बताएपछि वार्ता समितिले अन्तरपार्टी छलफल तिव्र पारेको थियो ।

‘माओवादी केन्द्र र जसपासँग कुराकानी भयो । उहाँहरु यो सरकार ढाल्न बिना सर्त तयार हुनुहुन्छ’ वार्ता समिति संयोजक खड्काले समाधानसँग भने, ‘तर जनमोर्चाले अझै पनि औपचारिक निर्णय गरेको पाइएन । त्यसैले स्थिति जहाँको तही छ ।’

जनमोर्चाले औपचारिक निर्णय नगरुन्जेलसम्म थप वार्ता र सम्वादको अर्थ नभएकाले अहिलेलेलाई जनमोर्चा कै निर्णयको पर्खाई रहेको खड्काले बताए ।

‘संसदीय दलको बैठकमा पनि वार्ता समितिको तर्फबाट यही जानकारी गरायौं र बैठक सकियो ।’ उनले भने ।

गण्डकी प्रदेश सभामा पृथ्वीसुब्बा गुरुङ नेतृत्वको सरकारले जोगाउने या नयाँ सरकार बनाउने चाबी राजमोसँग छ । कांग्रेस, माओवादी केन्द्र र जसपासंग सभामुख बाहेक २८ सांसद छन् भने पृथ्वीसुब्बा गुरुको पक्षमा २८ सांसद छन् । ६० सदस्यीय गण्डकी प्रदेश सभामा राजमोका ३ सांसद छन् । यी जता लाग्यो त्यतैको संख्या ३१ पुग्छ ।