समाधान संवाददाता, पोखरा

गण्डकी धौलागिरी पेट्रोलियम डिलर्स एसोसियसनले आफ्नो कार्यालय भवनमा १० बेडको आइसोलेसन तयार गरेको छ । कोरोना संक्रमण भएका विपन्न परिवार वा डेरामा बस्नेलाई समस्या देखिएकाले आइसोलेसन तयार गरिएको एसोसियसनका अध्यक्ष राजन गोगंजुले जानकारी दिए ।

एसोसियसनको पोखरा महानगरपालिका १४ चाउथेमा रहेको भवनलाई आइसोलेसन सेन्टर बनाइएको हो । जटिल प्रकृतिका संक्रमितका लागि नभईकोभिड देखिएका तर घर वा डेरामा परिवारसहित बस्न नमिल्नेका लागि प्रयोग गर्ने गरी आइसोलेसन बनाइएको हो ।

कार्यालयमा अहिले १० बेडसहित १५ दिनलाई पुग्ने खाद्यान्न तथा प्रारम्भिक मेडिसिन, माक्स, सेनिटाइजर, तातोपानीको व्यवस्था गरिएको छ ।

कार्यालयमै किचन र मनोरञ्जनका सामग्रीसमेत राखिएको अध्यक्ष गोगंजुले जानकारी दिए ।

पेट्रोलियम क्षेत्रमा क्रियाशील मजदुर र तिनका परिवार वा अन्य त्यस्ता विपन्न वर्गका संक्रमितलाई महानगरको स्वास्थ्य महाशाखासँग समन्वय गरी राख्ने तयारी छ । पहिलो चरणमा १० बेड निर्माण गरिए पनि कार्यालयको क्षमता २० बेडसम्म विस्तार गर्न सकिनेउनले बताए ।