पोखरा । पृथ्वीराजमार्ग बस सञ्चालक समितीले निषेधाज्ञा नमान्ने भएको छ । कम्पनीका अध्यक्ष योगेन्द्रबहादुर केसीले सोमबार पत्रकार सम्मेलन मार्फत् आफूहरुले निषेधाज्ञा नमान्ने बताएका छन् ।

सरकारले असार ३० सम्म निर्णय गरेर लामो दूरीका सार्वजनिक यातायात सञ्चालन नगरे आफूहरुले काउन्टर खुला गरी टिकट बुकिङ गर्ने केसीले बताए ।

‘यो निर्णय हाम्रो कुनै रहरले नभई दैनिक रोजीरोटीको व्यवस्था गर्न गरिएको अप्रिय निर्णय हो । यस निर्णयबाट आउन सक्ने जस्तो सुकै चुनौतीको पनि सामना गर्न तयार रहेको कुरा स्पष्ट पार्छौं,’ केसीले भनेका छन् ।

स्वास्थ्य मापदण्ड पालना गराउन समिती सजग रहेको बताइएको छ । बस सञ्चालकले नै स्यानिटाइजरको व्यवस्था गर्ने र मास्क नलगाउनेलाई गाडीमा प्रवेश नदिने जनाइएको छ । यात्रुले चाहेमा सहचालकलाई १० रुपैयाँ बुझाएर मास्क लिई यात्रा गर्न सक्ने पनि बताइएको छ ।

पृथ्वीराजमार्ग बस सञ्चालक समिती अन्तर्गत १४ सय सवारी साधनबाट ७२०० जना कर्मचारी, व्यवसायी लाभान्वित छन् ।