समाधान संवाददाता, पोखरा

कांग्रेसको १४ औं महाधिवेशन अन्तर्गत पोखरा महानगर समितिका सचिवमा टुवराज बास्तोलाले उम्मेदवारी घोषणा गरेका छन् । २७ भदौमा महानगर समितिको अधिवेशन हुँदैछ ।
बैंकिङ क्षेत्रबाट अवकास लिएका बास्तोलाले राजनीतिमा लोकतान्त्रिक मूल्य र मान्यता स्थापना गर्न उम्मेदवारी दिने उल्लेख गरेका छन् । कांग्रेसको विधानले महानगर समितिमा १ सभापति, २ उपसभापति र २ सचिव हुने व्यवस्था गरेको छ ।

‘कांग्रेस हुँ भनेर समाजमा शिर ठाडो पारेर हिँड्ने वातावरणको सिर्जना गरिनुपर्ने बास्तोलाले बताएका छन् । कांग्रेसमा पनि रुपान्तरण हुन अति आवश्यक रहेको उनल ठह¥याएका छन् । गुट उपगुट निर्मुल पारिनुपर्नेमा उनको जोड छ ।

‘स्थानीय स्तरदेखि केन्द्र स्तरसम्म जोश र होस् अनि जाँगर भएको, सदाचारी र कर्मठ, निष्ठावान कार्यकर्ता जनताको नवीन शक्तिको रूपमा रूपान्तरीत भई कार्यगत एकतालाई आत्मसात गरी अगाडि बढ्न सकिएन भने आगामी निर्वाचनको परिणाम गत निर्वाचनको परिणामभन्दा पनि तलै झर्न सक्ने छ भन्ने मेरो आँकलन हो,’ बास्तोलाले भनेका छन्, ‘पार्टीको विधान, निर्देशन र कार्यक्रमहरूमा आफूलाई पूर्ण रूपमा समर्पणभावमा लिप्त गराई पूर्णकालीन कार्यकर्ता भई जनताका भावनाहरूको कदर गर्दै यो पार्टीलाई हाम्रो र राम्रो बनाउँदै अन्तरपार्टी प्रतिस्पर्धामा पार्टी र उम्मेदवारलाई विजयी गराउन यसमा सबैले हेक्का राखौं र दत्तचित्त भएर लागौं ।’

कांग्रेसको मूल आदर्श र सिद्धान्त राष्ट्रियता, लोकतन्त्र र समाजवादलाई अंगीकार गरी पार्टी संगठनलाई अझ मजबुद, व्यवस्थित अनि दरिलो बनाउने तर्फ लागि पर्ने प्रण बास्तोलाले गरेका छन् । ‘नेपाल र नेपालीको हितका लागि सच्चा आस्थाको राजनीति गर्ने हो भने कांग्रेस पनि रुपान्तरण हुन अति आवश्यक छ भन्ने मेरो मान्यता हो,’ बास्तोलाले भनेका छन् ।