पोखरा ।
नेपाल विद्युत प्रधिकरणको निर्देशनमा पोखरा वितरण केन्द्रले इन्टरनेट सेवा प्रदायक कम्पनीको तार काटेको छ । केन्द्रले लेकसाइड, डिहिकोपाटन, लालुपातेमार्ग, ढुंगेसाँघु, छोरेपाटन, विरौटा, महतगौंडा, डेबिजफल्स गरि ९ ठाउँको तार काटेको हो ।

इन्टरनेट प्रदायकहरु भायनेट, क्लासिक टेक, वल्र्डलिंक, टेकमाइन्ड र कम्पनीको नाम नलेखिएका राउटरहरु प्राधिकरणले काटेको पोखरा वितरण केन्द्रका प्रमुख इन्जिनियर ऋषिकुमार बरनवालले बताए । इन्टरनेट प्रदायकले प्राधिकरणको बिजुलीको पोल प्रयोग गरेर ३ आर्थिक वर्षदेखि संरचना प्रयोग गरेबापत भाडा नतिरेको भन्दै पोखरा लगायत देशकै प्रमुख सहरमा तार काटेको हो ।

प्राधिकरणलाई २०७५ साल देखि भाडा नतिरेपछि प्राधिकरणले पहिलो चरणको कारबाही सुरु गरेको बरनवाले बताए । ‘यो पहिलो चरणको कारबाही थियो । माथिको निर्णय अनुसार हामी काम गछौं,’ बरनवालले भने, ‘हामीले शनिबार संकेतका रुममा अस्पताल, विद्यालय, सरकारी कार्यालयलाई मर्का नपर्ने गरि लाइन काटेका हौं ।’

पोखरामा काटिएको तार बढी असर नपर्ने ठाउँमा र अप्ठेरो नपर्ने ठाउँमा काटिएको उनले बताए । शनिबार काटिएको इन्टरनेट लाइनबाट ७ सय घर तथा व्यवसायहरुलाई असर परेको उनले बताए । प्राधिकरणले असार १५ सम्म भाडा तिर्न अल्टिमेटम दिएको थियो । प्राधिकरणलाई टेलिकम, एनसेल र डिसहोमले भाडा बुझाउँदै आएका छन् । प्राधिकरणले २०७५ असार देखि भाडा महँगो बनाएपछि इन्टरनेट प्रदायकहरुले सम्झौतामा हस्ताक्षर गरेका थिएनन् ।

निर्णयबाट पछि हट्यो प्राधिकरण
नेपाल विद्युत प्राधिकरणले इन्टरनेट सेवा प्रदायक नकाट्ने भएको छ । सोमबार प्राधिकरणले तार काट्दा उपभोक्ता प्रभावित भएको भन्दै प्राधिकरणपछि हटेको हो । कार्यकारी निर्देशक कुलमान घिसिङले सांकेतिक रुपमा तार काटेपनि उपभोक्तालाई परेको मर्कालाई ध्यानमा राखेर तत्काल थप तार नकाटिने बताएका छन् । प्राधिकरण जनताको हितमा काम गर्ने भएकाले उपभोक्तालाई असर नपर्ने गरी बक्तयौता उठाउन कदम चाल्ने निर्णय गरेको हो ।