पोखरा

रक्षामार्ग दिदीबहिनी समूहले आइतबार आयोजना गरेको कार्यक्रममा ३९ युनिट रगत संकलन भएको छ । वार्षिक कार्यक्रम अन्तर्गत समूहले उक्त कार्यक्रम गरेको हो ।

समूहकी अध्यक्ष प्रभा घिमिरेको अध्यक्षतामा भएको कार्यक्रममा टोलका ९ जना ज्येष्ठ नागरिकहरुको सम्मानसमेत गरिएको थियो । टोलका ८० वर्षमाथिका ज्येष्ठ नागरिकलाई सम्मान गरिएको हो । ज्येष्ठ नागरिकहरु पवित्रादेवी घिमिरे, बट्टाई गुरुङ, पदमकुमारी थापामगर, चन्द्रबहादुर थापामगर, जंगबहादुर पुन, तेजबहादुर गुरुङ, कलावती लम्साल, यामबहादुर गुरुङ र हरिकला गुरुङलाई माला र दोसल्ला ओढाएर सम्मान गरिएको थियो ।

कार्यक्रमका प्रमुख अतिथि पोखरा १० का वडा सदस्य दीपक थापाले महिला दिदीबहिनीहरु जागरुक भएर रक्तदानमा लागेकोमा धन्यवाद दिए । महिलाहरुका कार्यक्रमलाई वडाबाट पनि सरसहयोग दिने उनको भनाइ थियो ।