जोमसोम—बाक्लो हिमपातका कारण धौलागिरि आधार शिविरमा अलपत्र विदेशी पर्यटकको उद्दार गरिएको छ । धौलागिरि आधार शिविर नजिक अलपत्र परेका २ जना स्पेनिस नागरिक र ६ जना पर्यटक गाईडको सोमबार फिस्टेल एअरको हेलीकोप्टर मार्फत उद्दार गरिएको जिल्ला प्रहरी कार्यालय मुस्ताङले जनाएको छ ।
हिउदयामसंगै मुस्ताङमा चिसो बढ्न थालेको छ । योसंगै मुस्ताङका उच्चलेंकमा हिमपात पर्न थालेको हो ।धौलागिरि पदमार्ग हुदै यात्रा गर्ने उद्देश्यले उक्तक्षेत्रमा प्रस्थान गरेका उनीहरुको यात्रामा हिमपातले प्रभावित बनाएको जनाईन्छ ।

पोखराबाट म्याग्दी हुदै अक्टोबर २८ तारिखमा उनीहरु मुस्ताङ भित्रिएको एक्याप पर्यटक चेक पोष्टमा कार्यरत पर्यटन सहायक प्रेम बस्नेतले जानकारी दिए । उनीहरु मुस्ताङको घरपझोङ गापा—२ मार्फा हुदै बतासो डाडाको उपल्लो भागको धौलागिरि आधार शिविरमा अलपत्र परेका थिए । हिमपातले अलपत्र परेका पर्यटक तथा गाईडको जोमसोम ल्याई सकुशल उद्दार गरिएको प्रहरी नायब उपरिक्षक रामकुमार दानीले जानकारी दिए ।
यसअघि कार्तिक ७ गते मुस्ताङ र डोल्पाको सीमाना याकखर्कमा अलपत्र परेका जर्मनका २ पुरुष र र दुई महिला पर्यटकसहित २ जना गाईडको कैलाश एअरको हेलि मार्फत उद्दार गरिएको थियो । डोल्पाको दुनैबाट हिडेर मुस्ताङ आउने क्रममा बाक्लो हिमपातका कारण ५३सय मिटर अग्लो उचाईको याकखर्क भन्ने स्थानमा पदमार्ग पहिल्याउन नसक्दा उनीहरु अलपत्र परेका थिए ।