पोखरा

प्रदेश युवा तथा खेलकुद मन्त्री राजीव गुरुङ (दीपक मनाङे) र भूमि व्यस्था कृषि सहकारी तथा गरिबी निवारण मन्त्री चन्द्रबहादुर बुढाले ढिला गरी सम्पत्ति विवरण सार्वजनिक गरेका छन् । मुख्यमन्त्री कृष्णचन्द्र नेपाली पोखरेल र अन्य मन्त्रीहरुले यसअघि नै सम्पत्ति विवरण सार्वजनिक गरेका थिए ।

प्रदेश मन्त्रिपरिषदले बनाएको आचार संहितामा मन्त्री भएको ६० दिनभित्र सम्पत्ति विवरण सार्वजनिक गरिनुपर्ने उल्लेख छ । मनाङे जेठ २९ मा मन्त्री भएका थिए । बुढा भने ८ साउनमा मन्त्री भएका हुन् । मनाङ प्रदेश सभा खबाट निर्वाचित मन्त्री मनाङेले असोज १८ गते आप्नो सम्पत्ति विवरण मुख्यमन्त्री तथा मन्त्रिपरिषदको कार्यालयमा बुझाएका थिए । तर कार्यालयले मंगलबारमात्रै सार्वजनिक गरेको हो ।

६ करोड १० लाख रुपैयाँ ऋण लिएर ३ करोड ७० लाख रुपैयाँ तिरेको मनाङेको सम्पति विवरणमा उल्लेख छ । विवरण अनुसार मनाङे २ करोड ४० लाख रुपैयाँ ऋणमा देखिएको छ । मनाङे यसअघि पृथ्वीसुब्बा गुरुङ नेतृत्वको सरकारमा पनि २ पटकसम्म युवा तथा खेलकुद मन्त्री भएका थिए ।

मन्त्री मनाङेले सार्वजनिक गरेको विवरणमा सम्पत्तिको नाममा संघर्ष गाईभैंसी प्रालिमा ४० प्रतिशत हिस्सा, २२ तोला सुन, चाँदी ४५ तोला, मुगाको माला ८३ तोला छ । मुगा र चाँदी प्राप्तिको स्रोत व्यवसाय रहेको उल्लेख गरेका छन् । मनाङेले अर्कैको नाममा जग्गा र आफू ऋणमा रहेको पनि उल्लेख गरेका छन् । अर्कैको नाममा बैनापट्टा गरेको संयुक्त लगानीमा जग्गा र कृषि फार्म रहेको उनको विवरणमा छ ।

मनाङेले प्रकाश, कृष्ण र श्याम महर्जनको संयुक्त नाममा काठमाडौं २९ धर्मस्थलीमा क्रमश कित्ता नम्बर २४, ६७, ७६ को जग्गा रहेको खुलाएका छन् । प्रति आना ९ लाखमा जग्गा किनेको उनको विवरणमा छ । २०५४ सालमा १५ तोला र २०७० मा ७ तोला तत्कालीन मूल्यअनुसार खरिद गरी आफूसँग २२ तोला सुन रहेको मनाङेको सम्पत्ति विवरणमा उल्लेख छ । वैदेशिक रोजगारीबाट सुन प्राप्ति गरेको उल्लेख छ । उनको एभरेस्ट बैंक पोखरामा १० लाख ४९ हजार ५ सय ३६ रुपैयाँ मौज्दात रहेको देखाएका छन् । उक्त बैंक बचत सांसद र मन्त्री हुँदा प्राप्त भएको उल्लेख छ ।

भूमि व्यवस्था कृषि सहकारी तथा गरीवी निवारणमन्त्री चन्द्रबहादुर बुढाले पनि सम्पति विवरण सार्वजनिक गरेका छन् । उनको बागलुङ ताराखोला ५ मा पुख्र्यौली संगोलको जग्गा रहेको सार्वजनिक गरेका छन् । जनएकता बहुउद्देश्य सहकारी संस्थामा १० हजार रुपैयाँ रहेको पनि उल्लेख छ । एभरेस्ट बैंकको खातामा पैसा देखिँदैन । सांसद र मन्त्री भए स्वरुपको पारिश्रमिक एभरेस्ट बैंकको खातामा जम्मा हुन्छ । तर मन्त्री बुढाको उक्त बैंक खातामा शून्य मौज्दात रहेको उल्लेख गरेका छन् । गण्डकीका मुख्यमन्त्री कृष्णचन्द्र नेपालीसहित ९ जना मन्त्रीको सम्पत्ति विवरण भदौ ९ गते सार्वजनिक भएको थियो ।