बेसीसहर ।

डा. टकराज गुरुङ नेपाली कांग्रेस लमजुङको सभापति निर्वाचित भएका छन् । टकराजले ७१७ मत ल्याउँदा उनका प्रतिस्पर्धी गमप्रसाद गुरुङले ५८५ मात्रै प्राप्त गरेका हुन् । कांग्रेस चौधौं महाधिवेशन अन्तर्गत लमजुङमा बुधबार जिल्ला निर्वाचनको मत परिणाम आएको हो । टकराज ४ वर्षका लागि कांग्रेस जिल्ला सभापति भएका हुन् ।

टकराज पार्टीका केन्द्रीय सभापति शेरबहादुर देउवा पक्षका उम्मेदवार हुन् । टकराजले प्यानल बनाएका थिए । वरिष्ठ नेता रामचन्द्र पौडेल पक्षबाट गमप्रसाद प्यानलसहित उम्मेदवार बनेका थिए । लमजुङमा देउवा र पौडेलबाहेक तेस्रो धार पनि कांग्रेसमा छ । कोइराला परिवार पक्षधर शंकरकान्त जोशीको त्यो समूहमा वृषराज गुरुङ छन् । उनले टकराज प्यानललाई समर्थन गरेको थियो ।

टकराज र गमप्रसाद पक्षका १/१ जनाले उपसभापति जितेका छन् । सचिवमा पनि उनीहरुका १/१ जना आए । सहसचिवमा पनि त्यसै गरी उनीहरुका १/१ जना समर्थक विजयी भएका छन् । उपसभापतिमा गमप्रसाद पक्षका आनन्द घिमिरे निर्वाचित भएका छन् । घिमिरेले ७ सय १ र टकराजपक्षका श्रीकान्त घिमिरेले ६ सय ७८ मत ल्याए ।

२ जना उपसभापतिका लागि भएको प्रतिस्पर्धामा उनीहरुसँग पराजित गमप्रसाद पक्षका खड्गबहादुर गुरुङ र टकराज पक्षका लोकनाथ घिमिरे पराजित भए । सचिवमा टकराज पक्षधर कृष्णबहादुर अधिकारी र गमप्रसाद पक्षका विमल श्रेष्ठ विजयी भए । टकराज पक्षधर नवीनचन्द्र घिमिरे पनि सचिव भएका छन् । सहसचिवमा गमप्रसाद पक्षधर नरबहादुर गुरुङ र टकराजको प्यानलका विश्व पौडेल निर्वाचित भए ।