पोखरा ।
नेपाली कांग्रेस कास्की सभापतिमा आइबहादुर गुरुङले उम्मेदवारी दिएका छन् । कास्की कांग्रेसका उपसभापति उनले बिहीबार कास्की सभापतिमा आफ्नो उम्मेदवारी दर्ता गराएका हुन् ।

गुरुङको प्रस्तावकमा पुष्पेन्द्र पाण्डे क्षेत्र नम्बर ३ क को निर्वाचित सभापति, समर्थक प्रदेश ३ ख को जीवनाथ पौडेल (शंकर) निर्वाचित सभापति रहेका थिए । विद्यार्थीकालदेखि नै राजनीतिमा सक्रिय गुरुङ २०३३ सालदेखि नै राजनीतिमा सक्रिय छन् ।

उम्मेदवारी दर्ता गराउँदै गुरुङले पार्टी भित्रको अराजक गतिविधि अन्त्य गर्न र विधि विधान मर्यादा कायम गराउन आफूले सभापतिमा उम्मेदवारी दिएको बताए ।

‘नियम भन्दा पनि व्यक्तिको चाहनामा पार्टी चल्नुपर्छ भन्ने प्रवृतिको हाबी भइरहेको छ । यसले पार्टी धराशय बनेको छ । गएको चुनावमा नतिजा देखियो,’ उनले भने, ‘नेतृत्वले पार्टी र जनताभन्दा पनि आफ्नो आफन्तलाई मात्रै महत्व दिएको महसुस भई रहेको छ । यसबारे मैले पार्टी नेताहरुसँग कुरा गरि रहेको छ । गाउँमा बसेका मान्छेले पार्टी र संगठन जोगाई रहेको छ । त्यसकारण गाउँगाउँ गएर संगठन बनाउनुपर्छ । त्यहाँको बस्तुस्थिति हेर्नुपर्छ ।’ शुद्ध कांग्रेस बन्नुपर्छ भनेर उम्मेदवारी दिएको उनले बताए ।

‘यसको मतलव नेताहरुलाई अनादर होइन । नेताहरुलाई मान्छु । तर, चाकडी भयो । कुनै कार्यकर्ताले कुनै कार्यकर्ताको अस्तित्व नै स्वीकार भएन,’ उनले भने । संगठनमा रहेर नेताको पछाडी भन्दा जनताको साथमा रही रह्यो भने संगठन बलियो र सबल बन्ने उनको धारणा छ । स्वच्छ कांग्रैस र वैधानिक कांग्रेस भएर चल्नुपर्छ भनेर मैले उम्मेदवारी दिएको उनले बताए । पार्टी संगठन गर्न सक्रिय गुरुङ ०४३ सालमा लुम्ले पञ्चायतमा पनि निर्वाचित भएका थिए । पार्टी प्रतिबन्धित अवस्थामा संगठन विस्तार गर्दा महाधिवेशन प्रतिनिधि, कास्की कांग्रेस उपसभापति हुँदै गुरुङ सभापतिमा चुनाव लड्दै छन् ।