संगम परियार

पोखरा–राष्ट्रिय वाणिज्य बैंक लिमिटेडको ५७ औं वार्षिकोत्सवको उपलक्ष्यमा आयोजित मैत्रिपूर्ण फुटसलको उपाधी दयाराम पन्तको टोलीले हात पारेको छ । पोखराको अमरसिंह फुटसलमा आयोजित प्रतियोगितामा निर्धारित समयमा हितकाजी गुरुङको टिमसँग दयारामको टिम ४÷४ को बराबरीमा रोकिएको थियो ।

पेनाल्टीमा दयारामको टोलीले हितकाजीको टिमलाई २÷१ ले पराजित गरेको राष्ट्रिय वाणिज्य बैंक प्रादेशिक कार्यालय पोखराका प्रादेशिक प्रवन्धक प्रमोद अधिकारीले जानकारी दिए । प्रतियोगितामा पोखरा उपत्यका भित्रका ६ शाखा र प्रादेशिक कार्यालय गरी ७ कार्यालयको सहभागिता थियो ।

प्रतियोगितामा म्यान अफ दि म्याचको उपाधि दयाराम पन्त, बेस्ट गोलकिपर राम चन्द्र थापा, उदीयमान खेलाडी प्रणय क्षेत्री, अजित मन्डल र प्रकाश बोगटी र भेट्रान खेलाडी हितकाजी गुरुङ घोषित भए ।

राष्ट्रिय वाणिज्य बैंकको ५७ औ वार्षिकोत्सवको अवसर पारी माघ ५ गते रक्तदान, माघ ७ गते सबै कार्यालय परिसरमा सरसफाइ, माघ ८ गते प्रभातफेरी र माघ १० गते बैंकको वार्षिकोत्सव मनाइने राष्ट्रिय वाणिज्य बैक प्रादेशिक कार्यालय पोखराका प्रादेशिक प्रबन्धक अधिकारीले जानकारी दिए ।